Европада теракт уюштирмоқчи бўлган қирғизистонлик ушланди

Қирғизистон Миллий хавфсизлик давлат қўмитаси ходимлари хорижлик ҳамкасблари билан биргаликда Европа давлатларидан бирида террорчилик ҳаракати содир этилишининг олдини олди. Бу ҳақда қўмита матбуот маркази хабар берди.

Қайд этилишича, терактнинг потенциал айбдорларидан бири “чет элда яширинган” Қирғизистон фуқароси бўлган, унинг исми ва фамилияси тергов манфаати учун ошкор қилинмаяпти. Қирғизистонда унга нисбатан аввалроқ республика Жиноят кодексининг хорижий давлат ҳудудидаги қуролли можароларда ёки ҳарбий амалиётларда Қирғизистон фуқаросининг иштирок этиши ёки террорчилик ҳаракатини амалга ошириши учун тайёргарликдан ўтказиш моддаси билан иш қўзғатилган.

Гумонланувчи хорижда ушланиб, Қирғизистонга олиб кетилган ва Миллий хавфсизлик давлат қўмитасининг тергов изоляторига жойлаштирилган. Ушбу жиноий иш бўйича тергов доирасида Қирғизистоннинг Чуй вилоятининг Тўқмоқ шаҳрида 17 та манзилда тинтув ўтказилди, унинг давомида ИШИД маълумотлари акс этган экстремистик адабиётлар электрон ташувчилар, наркотик моддалар ва ўқ-дорилар топилиб, мусодара қилинди.

“Ҳозирда тергов-тезкор тадбирлари давом этмоқда”, дейилади хабарда.

Миллий хавфсизлик давлат қўмитаси қўлга олинган шахс Европанинг қайси давлатида террорчилик ҳаракатини амалга оширишни режалаштирганини маълум қилмаган.