Еб тўймаган... Хитой Туркманистон газидан кўпроқ олмоқчи

Бугун, 5 февраль куни Хитой Халқ Республикаси Си Цзиньпин Туркманистон Президенти Гурбангули Бердимуҳамедовга нефть-газ соҳасидаги икки томонлама ҳамкорликни мутлақо янги босқичга кўтаришини таклиф қилди. Бу ҳақда Хитой Ташқи ишлар вазирлиги Матбуот хизмати маълум қилди.

“Хитой томони Туркманистон билан ҳамкорликда яқин келажакда ва узоқ муддатли истиқболда ҳамкорлигимизни режалаштириш билан боғлиқ масалаларни ўрганишни кучайтиришга, газ саноати соҳасидаги ҳамкорлигимизга кўпроқ аҳамият беришга ва унинг кўламини кенгайтиришга тайёр. Шундай экан бу ҳамкорликни бутунлай янги босқичга кўтарайлик”, деган Си Цзиньпин.

ХХР Раисининг таъкидлашича, Пекин Ашхобод билан ўзаро манфаатли ҳамкорликка интилади. У Туркманистон билан “бутун саноат занжирини қамраб олган” газ етказиб бериш бўйича ҳамкорликни кенгайтириш тарафдори.

“Газ соҳасидаги Хитой-Туркманистон ҳамкорлиги мамлакатларимизнинг ижтимоий-иқтисодий ривожланишига сезиларли рағбатлантирувчи таъсир кўрсатди”, деб қўшимча қилди Си Цзиньпин.

Шунингдек, Хитой раҳбари Бердимуҳамедовни Хитой халқаро майдондаги вазият ўзгаришидан қатъи назар, Туркманистоннинг ишончли дўсти ва ҳамкори бўлиб қолишига ишонтирди.

“Биз ўзаро ҳамкорлик қилишга, барча соҳаларда ўзаро манфаатли ҳамкорликни мустаҳкамлашга тайёрмиз”, деган Си Цзиньпин.

ХХР Бош божхона бошқармаси маълумотларига кўра, Туркманистон Пекинга табиий газ қувурлари етказиб берувчи асосий давлатлар орасида биринчи ўринни эгаллаб турибди. 2021 йилда Хитой бу давлатдан 6,79 миллиард долларлик 24 миллион тонна газ импорт қилган. Таъминот бўйича Россия иккинчи ўринда туради. Шунингдек, Қозоғистон (1,11 миллиард долларга 4,59 миллион тонна), Ўзбекистон (798,98 миллион долларга 3,25 миллион тонна) ва Мьянма (1,41 млрд долларга 3,04 млн тонна) ҳам Хитойни газ билан таъминлаб туради.