Vazirliklarning saytlariga joylashtirilishi kerak bo‘lgan ma’lumotlar turi kengaydi

O‘zbekiston Respublikasi Vazirlar Mahkamasining “Davlat ishtirokidagi xo‘jalik jamiyatlari hamda davlat unitar korxonalari to‘g‘risidagi ma’lumotlarni oshkor etish tizimini takomillashtirish chora-tadbirlari to‘g‘risida”gi qarori qabul qilindi. 

Qarorga ko‘ra, vazirlik va idoralarning rasmiy veb-saytlarida mulkdor funksiyalari amalga oshirilayotgan davlat ulushi 50 foiz va undan ortiq bo‘lgan xo‘jalik jamiyatlari va davlat unitar korxonalarining quyidagi ma’lumotlari joylashtiriladi:

•    ustav fondi;
•    davlat ulushi;
•    har chorak va yil yakunlari bo‘yicha buxgalteriya balansi va moliyaviy natijalari;
•    ishlab chiqarish ko‘rsatkichlari;
•    ish o‘rinlari soni;
•    korxonalar boshqaruv va nazorat organlari tarkibi.

2021 yil 1 yanvardan davlat ishtirokidagi korxonalarning rasmiy veb-saytida iqtisodiy, moliyaviy va boshqa statistik mu’lumotlar, shu jumladan, har chorakda yillik biznes-rejaning bajarilishi to‘g‘risidagi hisobot joylashtiriladi.

Davlat ishtirokidagi korxonalar quyidagi ma’lumotlarni har chorak yakunlari bo‘yicha Davlat aktivlarini boshqarish agentligining maxsus axborot tizimida joylashtirib boradi:

•    biznes-reja ko‘rsatkichlari bajarilishi; 
•    ishlab chiqarish quvvatlaridan foydalanish; 
•    soliq va davlat maqsadli jamg‘armalariga to‘lovlar; 
•    tashqi qarzdorlik;
•    mahalliylashtirish va investitsiya loyihalari bajarilishi to‘g‘risidagi ma’lumotlar.