Ўзгидромет: дам олиш кунлари баъзи ҳудудларда ёғингарчилик кузатилиши мумкин

Ўзбекистонда яқинлашаётган дам олиш кунларида булутли об-ҳаво сақланиб қолади. Баъзи ҳудудларда ёғингарчилик кутазитилиши мумкин.

Ўзгидромет хабарига кўра, кеча, 22 октябрь куни Ўзбекистон ҳудудига Уралдан совуқ ҳаво оқими кирди. Бутун республика ҳудуди бўйича булутлилик ортди, Фарғона водийси вилоятларида, тоғли ва тоғолди ҳудудларида ёмғир, баланд тоғли ҳудудларда қор ёғди. Тошкент ва Наманган вилояти тоғларида 2000 м дан юқори зоналарда қор қоплами ҳосил бўлди. Ўтган иссиқ давр билан солиштирганда ҳаво ҳарорати 8-10 даражага пасайди.

Бугун, 23 октябрда Ўзбекистон ҳудуди совуқ ҳаво оқим таъсирида бўлади. Республика ҳудудининг катта қисмида ҳаво булутли бўлади, ёғингарчилик бўлмайди, фақат Фарғона водийси вилоятларида айрим жойларга ёмғир ёғади, тоғли ва тоғолди ҳудудларда айрим жойларга ёмғир, қор ёғади. Ҳарорат 13-18 даража атрофида бўлади.

Эртага ҳаво оқими шарққа томон силжийди. Ёғингарчилик эҳтимоли фақат республиканинг айрим тоғли ҳудудларидагина сақланиб туради. Мамлакат ҳудуди устида булутлилик сақланиб туриши ҳисобига эртага ҳарорат ўзгармайди.

Якшанба куни жануби-ғарбий оқимлар ҳисобига совуқ ҳаво Ўзбекистон ҳудудидан чекинади. Бутун республика бўйича об-ҳаво кам булутли ва қуруқ бўлади. Кечаси ҳарорат 3-6 даража илиқ бўлади, кундузи 17-20 даражагача исийди, бундай ҳарорат меъёрий қийматлардан бироз паст.