Ўзгалар парваришига муҳтож шахсларга бепул бериладиган товарлар рўйхати янгиланди

Ўзбекистон Республикаси Вазирлар Маҳкамасининг айрим қарорларига ўзгартиришлар киритилди.

Жумладан, Кам таъминланган оилаларга ижтимоий нафақалар ва моддий ёрдам тайинлаш ва тўлаш тартиби тўғрисидаги низомга киритилган ўзгартиришга кўра, эндиликда нафақалар ва моддий ёрдам олиш учун оила таркибига қуйидагилар киритилмайди:

•    болаларнинг улар билан биргаликда яшайдиган боболари ва бувилари;

•    болаларнинг ота-оналари (фарзандликка олувчилар) билан биргаликда хўжалик юритувчи бошқа шахслар.

Шунингдек, эндиликда шахсий ёрдамчи (деҳқон) хўжалигини юритишдан олинадиган норматив даромад ушбу хўжаликни юритиш учун фойдаланиладиган сотихлар сонини меҳнатга ҳақ тўлашнинг энг кам миқдорининг 0,035 миқдорига кўпайтириш йўли билан аниқланади.

Илгари меҳнатга ҳақ тўлашнинг энг кам миқдорининг 0,071 миқдорига кўпайтириб аниқланган.

Бундан ташқари, Ўзгалар парваришига муҳтож бўлган ёлғиз кексалар ва ногиронларни бепул таъминлаш учун асосий озиқ-овқат маҳсулотлари ва гигиена товарларининг рўйхати янгиланди.

Рўйхатга карантин тадбирлари амал қилиш даврида қўшимча равишда бепул бериладиган қуйидаги маҳсулотлар қўшилди:

•    бир марта ишлатиладиган стерил ниқоб;
•    бир марта ишлатиладиган стерил қўлқоплар;
•    суюқ ёки гель ҳолатидаги анисептик;
•    антибактериал совун.

Эслатиб ўтамиз, рўйхатда ҳозирга қадар 15 турдаги маҳсулот мавжуд эди.