Ўзбекистоннинг сиёсий лидерлари Рустам Қосимов вафоти муносабати билан ҳамдардлик билдирди

Жамият 7805
image
-

Аввал хабар берганимиздек, давлат ва жамоат арбоби, Ўзбекистон Республикаси Президентининг маслаҳатчиси, олим ва педагог Рустам Собирович Қосимов оғир касалликдан сўнг шу йил 7 май куни 65 ёшида вафот этди.

Ўзбекистон Президенти Шавкат Мирзиёев, Сенат раиси Танзила Норбоева, Қонунчилик палатаси спикери Нурдинжон Исмоилов, Бош вазир Абдулла Арипов ва Президент администрацияси раҳбари Зайнилобиддин Низомиддинов Рустам Қосимов вафоти муносабати билан ҳамдардлик билдирди

“У бутун онгли ҳаётини эл-юртга беминнат хизмат қилишга бағишлаган фидойи раҳбар мамлакатимиз тараққиётини янги босқичга кўтариш, янги Ўзбекистонни барпо этиш жараёнларида фаол иштирок этди. Ушбу даврда олий ва ўрта махсус таълим вазири, Ўзбекистон Республикаси Президенти Давлат маслаҳатчисининг биринчи ўринбосари, Давлат маслаҳатчиси, Давлат бошқаруви академияси ректори лавозимларида қизғин фаолият олиб борди.

Кейинги йилларда Ўзбекистон Республикаси Президентининг Жамоат ва диний ташкилотлар билан ҳамкорлик масалалари бўйича маслаҳатчиси ва айни вақтда Ўзбекистон халқаро ислом академияси ректори лавозимларида самарали ишлаб, юртимизда миллатлараро дўстлик ва ҳамжиҳатликни мустаҳкамлаш, диний-маънавий қадриятларимизни тиклаш ва ривожлантириш, маҳалла институтининг ўрни ва нуфузини ошириш, нуронийлар, хотин-қизлар ва ёшларни ҳар томонлама қўллаб-қувватлаш, камбағалликни қисқартириш, ижтимоий-маънавий муҳит барқарорлигини таъминлашга қаратилган муҳим давлат дастурларини амалга оширишда ўзининг бой билим ва тажрибаси, юксак салоҳиятини сафарбар этди.

Р.С.Қосимов салкам 50 йиллик меҳнат фаолияти давомида қайси лавозимда ишламасин, доимо халқимиз ва Ватанимиз манфаатини кўзлаб, фидокорона меҳнат қилди. Мамлакатимиз жамоатчилиги унинг илм-фан, таълим-тарбия соҳасидаги кенг кўламли ислоҳотларни амалга ошириш, ёшларни миллий ва умумбашарий қадриятлар руҳида тарбиялаш, Ўзбекистоннинг халқаро обрў-эътиборини ошириш борасидаги хизматларини яхши билади ва юксак қадрлайди.

Р.С.Қосимов давлатимиз ва халқимиз олдидаги хизматлари учун “Меҳнат шуҳрати” ордени билан мукофотланган эди.

Халқимизнинг етук фарзанди, таниқли давлат ва жамоат арбоби, ёшларнинг меҳрибон устози, камтарин ва самимий инсон Рустам Собирович Қосимовнинг ёрқин хотираси қалбларимизда ҳамиша сақланиб қолади”, дейилади ҳамдардлик матнида.

Маълумот учун, Рустам Қосимов 1955 йил 30 августда Тошкент шаҳрида зиёлилар оиласида туғилди. Ўрта мактабни тугатиб, Тошкент давлат университети (ҳозирги Ўзбекистон Миллий университети)нинг шарқшунослик факультетида таҳсил олди.

Меҳнат фаолиятини Тошкент сув хўжалиги институтида бошлаб, бир неча йил давомида хорижий Шарқ мамлакатларида таржимон бўлиб хизмат қилди. Кейинчалик Тошкент давлат университетида тадқиқотчи, ўқитувчи, катта ўқитувчи, факультет декани лавозимларида ишлади, педагогик фаолиятни илмий изланишлар билан уйғун ҳолда олиб бориб, иқтисод фанлари доктори илмий даражаси ва доцент унвонига сазовор бўлди.

Қосимов Ўзбекистон мустақиллигининг дастлабки йилларида Тошкент давлат техника университети ҳамда Ўзбекистон Республикаси Президенти ҳузуридаги Давлат ва жамият қурилиши академиясида кафедра мудири, факультет декани, Банк-молия академияси ректори, олий ва ўрта махсус таълим вазирининг биринчи ўринбосари ва вазир, Жаҳон иқтисодиёти ва дипломатия университети ректори, Ўзбекистон Республикаси Бош вазири ўринбосари каби масъул вазифаларда сидқидилдан меҳнат қилди.

Шунингдек, у Ўзбекистон Касаба уюшмалари федерациясининг бошқарув тизимида турли лавозимларда ишлади.

Умиджон Нозимжонов
Мақолага баҳо беринг
Баҳолаганлар: 217
Рейтинг: 3
t
×