Ўзбекистон валютасининг қадрсизланиши бўйича Марказий Осиёда биринчи бўлди

2023 йилда Марказий Осиёнинг беш давлатидан Ўзбекистон валютаси долларга нисбатан энг кўп қадрсизланган пул бирлигига айланди – йиллик қадрсизланиш 10%. Кейинги ўринда эса 7,5 фоизлик фарқ билан Тожикистон сомонийси бормоқда. МДҲда эса долларга нисбатан қадрсизланиш борасида Россия рубли ва Беларусь рубли катта йўқотишларга учраган. 

Қозоғистон ва Молдова миллий валюталари АҚШ долларига нисбатан ўсишни кўрсатди. Молдова лейҳи бошқаларга қараганда кўпроқ – 8,8 фоизга мустаҳкамланди. Арманистон, Беларусь, Қирғизистон, Россия, Тожикистон ва Украина валюталари долларга нисбатан арзонлашди, Россия рубли энг кўп қийматини йўқотди – 27,5%. Шу билан бирга, Озарбайжон, Грузия ва Туркманистонда йил якунида доллар курси ўзгармади. 

Қуйидаги МДҲ мамлакатларида миллий валюталар АҚШ долларига нисбатан қийматини қанчалик ушлаб қолгани билан танишишингиз мумкин. 

Озарбайжон

2017 йил апрель ойидан буён бу штатда 1 доллар учун 1,7 манатлик қатъий белгиланган курс мавжуд. 

Арманистон

Йил бошида бир доллар 394 драм бўлган бўлса, баҳорда тахминан 385 драмга тушиб кетди. 19 сентябрь куни Озарбайжон Қорабоғда “аксилтеррор чоралари” бошланганини эълон қилди, 28 сентябрда эса тан олинмаган Тоғли Қорабоғ республикаси президенти Самвел Шаҳраманян барча давлат идораларини тарқатиб юбориш тўғрисидаги фармонни имзолади, Қорабоғнинг арман аҳолиси оммавий равишда ҳудудни тарк этди. Бундай шароитда драм кескин пасайиб кетди (4 октябрда энг юқори чўққисида – 1 доллар учун 429 дона). Бироқ, бир неча кундан кейин курс 1 доллар учун 400 драм атрофида барқарорлашди. Арманистон Республикаси Марказий банки 2023 йил 31 декабрь ҳолатига кўра, 1 доллар учун 404,8 драм курсини белгилади. Умуман олганда, йил якунида арман валютаси долларга нисбатан 2,7 фоизга заифлашди. 

Беларусь

2023 йил 1 январда АҚШ доллари 2,73 Беларусь рублига тенг эди. Йил бошида, Россия рублидан кейин Беларусь валютаси қисқа вақт ичида 1 доллар учун 2,62 Беларусь рублига қадар мустаҳкамланди, аммо кейин заифлаша бошлади. Июнь ойида, 2022 йил баҳоридан бери биринчи марта, 1 доллар учун 3 Беларусь рубли психологик чегараси енгиб ўтилди. Октябрь ойининг биринчи ярмида курс 1 доллар учун 3,36 Беларусь рублига тушди. 31 декабрь куни бир доллар 3,18 Беларусь рублига тенг эди. Шу тариқа Беларусь валютаси 16,5% га заифлашди. 

Грузия

Йил бошида бир доллар 2,7 лари эди, май ойигача Грузия валютаси мустаҳкамланиб, 1 доллар учун 2,48 ларига етди. Бироқ, кейин у яна арзонлашди ва йилни январдаги каби деярли бир хил даражада якунлади – 1 доллар учун 2,69 лари. 

Қозоғистон

2023 йил 1-4 январь кунлари долларнинг расмий курси 462,65 тенге этиб белгиланди. Биринчи чорак Қозоғистон валютасининг мустаҳкамланиши билан ажралиб турди – 1 доллар учун 431 тенгегача, аммо кейин у 1 доллар учун тахминан 435 тенге қийматида мустаҳкамланди. Август ойида тенге қадрсизлана бошлади ва 1 доллар учун 480 тенге даражасига яқинлашди, бироқ йил охирига келиб у 453 тенгегача мустаҳкамланди. 2023 йил охирида доллар тенгега нисбатан 2 фоизга арзонлашди. 

Қирғизистон

Йил бошида қирғиз сомининг курси 1 доллар учун 85,86 этиб белгиланган эди. 2022 йилдан фарқли ўлароқ, курс кучли тебранишларга дучор бўлмади. Февраль ойида доллар нархи 87 сомга, октябрда эса 89 сомгача кўтарилган эди. 2023 йил 30 декабрдан 2024 йил 7 январгача бўлган даврда курс 1 доллар учун 89,09 сом этиб белгиланди. Умуман олганда, йил охирида Қирғизистон валютаси Америка валютасига нисбатан 3,8 фоизга заифлашди. 

Молдова

2023 йил бошида бир доллар 19,13 лейга тенг эди. Умуман олганда, йил давомида Молдова Миллий банки лейни мустаҳкамлаб, декабрь ойининг охирига келиб 17,45 лейга етказди. Мамлакат валютаси йил охирига келиб долларга нисбатан 8,8 фоизга мустаҳкамланди. 

Россия

2023 йилда Янги йил байрамларида бир доллар 70,33 рублга тенг эди. 31 декабрь куни валюта курси 89,69 рубль этиб белгиланди. Умуман олганда, рубль долларга нисбатан 27,5 фоизга заифлашди. 

Тожикистон

2023 йил бошида Тожикистонда валюта курси 1 доллар учун 10,2 сомонийни ташкил қилган эди. Февраль ойида курс 1 доллар учун 10,96 сомоний қилиб белгиланди ва йил охиригача шу даражада сақланиб қолди. Йил давомида тожик валютаси долларга нисбатан 7,5 фоизга заифлашди. 

Туркманистон

2015 йилнинг январь ойидан бошлаб Туркманистонда 1 доллар учун 3,5 манатлик расмий курс белгиланган. 

Ўзбекистон

Ўзбекистонда 2023 йилда сўмнинг долларга нисбатан 2020 йил март ойида бошланган босқичма-босқич пасайиши давом этди. Йил бошида бир доллар 11,25 минг сўм бўлган бўлса, 2023 йил 31 декабрга келиб 12,38 минг сўмга кўтарилди. Шу тариқа ўзбек валютаси 10 фоизга қадрсизланди. 

Украина

2022 йил июль ойидан бошлаб Украина Миллий банки гривна курсини 1 доллар учун 36,56 даражасида ушлаб турди. 2023 йил октябрь ойида белгиланган валюта курсидан воз кечиш эълон қилинди. Ноябрь ойида вақтинча 1 доллар учун 36 гривнагача мустаҳкамланди, аммо кейин курс ўсишни бошлади. Декабрь ойи ўрталарида 1 доллар учун 37 гривна чегерасидан биринчи марта ошиб кетди. 31 декабрь ҳолатига кўра, валюта курси 1 доллар учун 37,98 гривна қилиб белгиланди. Умуман олганда, йил охирида Украина пул бирлиги долларга нисбатан 3,9 фоизга заифлашди.