UzAuto Турин политехника университети билан йирик индустриал таълим тизимини яратади

2022 йилнинг 16-19 май кунлари UzAuto таклифига биноан, Ўзбекистон автомобилсозлик саноати ҳамда бошқа ишлаб чиқариш саноат тармоқларини янада ривожлантириш, шунингдек, юқори технологияли ишлаб чиқариш соҳаларида рақобатбардош мутахассислар базасини яратиш мақсадида, Италиянинг Турин политехника университети (ИТПУ) делегацияси жавоб ташрифи билан Ўзбекистонга ташриф буюрди.

“Ўзавтосаноат” АЖ бошқаруви раиси ҳамда ўринбосарларининг Турин политехника университети ректори профессор Гуидо Саракко бошчилигидаги Италия делегацияси билан учрашуви давомида, профессор Анита Табакко ва Competence Industry Production бош директори Энрико Писино билан ҳамкорликда соҳа кадрларини тайёрлашни ривожлантиришга қаратилган қатор муҳим стратегик қарорлар қабул қилинди. Тошкентда бўлиб ўтган учрашувда Ўзбекистоннинг барча саноат тармоқларини ривожлантириш учун асос бўладиган халқаро даражадаги мутахассислар тайёрлашнинг дуал тизимини яратиш музокаралар мавзуси бўлди. Музокаралар давомида UzAuto тизимидаги таълим муассасаларини ягона тизимга бирлаштириш ва ишлаб чиқариш эҳтиёжлари учун халқаро стандартларга мувофиқ яратилган ўқув дастури асосида янги ўқув марказларини ташкил этиш таклиф этилди.

Ишлаб чиқариш мутахассисларини тайёрлашга ўзига хос ёндашув UzAuto тизимидаги олий ўқув юртлари ва академияларида юқори малакали кадрларни тайёрлаш имконини беради. Ишлаб чиқариш ва ўқув жараёнларининг тўлиқ синергияси мутахассисларнинг амалий тайёргарлиги даражасини янги босқичга олиб чиқади ва ўқув жараёни якунида натижаларга эришишга тайёр бўлган мутахассислар қабул қилиш имконини беради.

Асакадаги завод ишлаб чиқариш қувватлари негизида “UzAuto Академияси” дуал таълим ва малака ошириш марказини ташкил этиш Европанинг энг йирик саноат университети ИТПУ вакиллари таклиф этган қарорлардан бири бўлди. Маълумот учун, бугунги кунда Германияда ҳам худди шундай дастур доирасида йилига 700 000 нафар мутахассис ўз малакасини оширмоқда.

Бугунги кунга келиб Ўзбекистон автомобилсозлик соҳасида фаолият юритаётган 28 минг нафар ходимдан 70 фоизи малака оширишга муҳтож. Бундан ташқари, соҳага ҳар йили 1 000 – 1 500 янги мутахассислар талаб қилинади. Барча тармоқлар бўйича республика кесимида бу маълумотлар жуда катта сонга етади. Ушбу муаммони нафақат автомобилсозлик, балки бошқа ишлаб чиқариш тармоқларида ҳам ҳал қилиш учун Италиянинг Турин политехника университети билан ҳамкорликда Андижон шаҳрида “Industry 4.0” илғор технологияларга йўналтирилган ўқув марказини ташкил этиш бўйича келишувга эришилди. Ишлаб чиқариш корхоналари учун кадрлар тайёрлаш дастури бутун дунёдаги етакчи мутахассислар иштирокида амалий семинарлар ва вебинарлар ташкил этиш орқали амалдаги мутахассисларнинг малакасини мунтазам ошириб боришни ўз ичига олади.

Лойиҳани амалга ошириш жараёнини ўрганиш мақсадида Италия делегациясининг ташрифи дастурига Тошкент шаҳридаги Турин политехника университети ва Андижон машинасозлик институтига ташриф буюриш киритилган. Ўзбекистон профил ўқув муассасаларининг автомобиль ишлаб чиқарувчиларни тайёрлаш бўйича жаҳон етакчиси билан яқин ҳамкорлиги, автомобилсозлик соҳаси мутахассисларини тайёрлаш бўйича юқори тоифали ва рақобатбардош конвеерни шакллантириш истиқболларини очиб беради.

Италиялик шериклар билан ҳамкорликнинг навбатдаги босқичи автомобилсозлик саноатида ишлаб чиқариш жараёнларини автоматлаштириш, роботлаштириш, лойиҳалаш ва жиҳозлашда қўллаб-қувватлаш бўлади. Дастур CRM 4.0 Competence Center (Италия) билан биргаликда амалга оширилади ва унда мавжуд ишлаб чиқариш муаммоларини аниқлаш ва уларни бартараф этиш усулларини ишлаб чиқиш вазифаси бўлади. Дастур CRM 4.0 Competence Center (Италия) билан биргаликда амалга оширилади, унинг доирасида мавжуд ишлаб чиқариш муаммоларини аниқлаш ва уларни бартараф этиш усулларини ишлаб чиқиш учун вазифали технологик марказ ташкил этилади.

Ташриф доирасида италиялик ҳамкорлар Андижонда жойлашган “Uz Koram Ko”, “O‘zERAE Climate Control”, “O‘zAuto-Austem”, “Uz-Tong Heung Co”, Фарғонадаги “AvtoOyna”, Тошкентдаги “UzAuto Motors Powertrain” ва “UzAuto Cepla” маҳаллийлаштириш корхоналарига ташриф буюришди. “Ўзавтосаноат” АЖ бошқарув раиси жорий йилнинг апрель ойида Италияга ташрифида эришилган келишув доирасидаги италиялик ҳамкорларнинг барча ишлаб чиқариш жараёнларига, мутахассисларнинг зарур компетенцияларига ва мавжуд салоҳиятга бўлган юқори қизиқиши келажакдаги қўшма лойиҳаларга жиддий ёндашиш билан боғлиқ.

Ҳар бир корхонага ташриф доирасида италиялик шериклар билан ҳамкорлик қилиш мумкин бўлган соҳаларда, хусусан, ишлаб чиқаришнинг кадрлар масалалари – амалдаги мутахассислар ва кадрлар етишмовчилиги туфайли юзага келаётган муаммолар ҳақида маълумот берилди.

Италиянинг Турин политехника университети билан ҳамкорликда автомобилсозлик соҳасида мутахассислар тайёрлаш учун Ўзбекистонда таълим муассасаларини ташкил этиш тўғрисидаги келишувларнинг амалга оширилиши саноат корхоналарининг кадрлар билан боғлиқ муаммоларини бартараф этиш ва бутун минтақа учун соҳа мутахассисларини ташкил этиш имконини беради. 

Аввалроқ, Италияда ўтказилган дастлабки музокараларда 2023 йилда Тошкентда Италиялик ҳамкорлар кўмагида “Шаҳар инфраструктурасида автомобиль интеллектуал тизимларини ўрганиш учун лаборатория” ташкил этиш бўйича келишувга эришилганди. Шунингдек, ўқув жараёнига италиянинг профессор-ўқитувчилари ва мутахассислари жалб этиладиган “Саноат ишлаб чиқариш технологиялари” (Industrial manufacturing technologies) касб-ҳунар таълимининг янги йўналишини очиш бўйича ҳам келишувга эришилди. Ушбу таълим дастури 2022-2023 ўқув йилидан бошлаб Тошкент шаҳридаги Турин политехника университетида амалга оширилиши режалаштирилган. Бу таълим дастурида 150 нафар талаба қабул қилинади. 2023-2024 ўқув йилидан бошлаб Андижон машинасозлик институтида янги таълим дастури жорий этилади. Умуман олганда, 2026 йилгача “Саноат ишлаб чиқариш технологиялари” дастури бўйича талабалар сонини 10 минг нафарга етказиш кўзда тутилган.
www.uzavtosanoat.uz
 

Реклама ҳуқуқи асосида