UzAuto Давлат раҳбарига қишлоқ хўжалиги техникаларига сервис хизмат кўрсатиш лойиҳасини тақдим этди

Бизнес 7981
image

Давлатимиз раҳбарининг Косон туманидаги "Бунёдкор" пахта-тўқимачилик кластерига ташрифи давомида Шавкат Мирзиёевга "Agro Tech Klaster" қишлоқ хўжалиги техникалари учун эҳтиёт қисмларни таъминлаш ва техник хизмат кўрсатиш марказлари тармоғи лойиҳаси тақдим этилди. Шунингдек, лойиҳа тақдимотида қишлоқ хўжалиги техникаларини сотиш ва уларга хизмат кўрсатишнинг рақамли тизими ҳамда коммунал ва сервис хизмат кўрсатиш учун бир қатор махсус техникалар тақдим этилди. 

"Agro Tech Klaster" лойиҳасини амалга ошириш доирасида UzAuto минтақавий дилерлик марказлари негизида қишлоқ хўжалиги техникалари учун эҳтиёт қисмларни таъминлаш ва уларга техник хизмат кўрсатиш бўйича 14 та сервис марказини шакллантириш кўзда тутилган. Ҳар бир марказ техник, эҳтиёт қисмлар, сарфланадиган материаллар ва марказлашган кол-марказ мутахассислари билан таъминланади. Бундан ташқари, марказлар негизида қишлоқ хўжалиги техникаларига хизмат кўрсатиш бўйича техник мутахассислар тайёрлаш ва малакасини ошириш бўйича ўқув машғулотлари ташкил этилади.

Барча ҳудудлардаги фермерларга ўз вақтида сифатли хизмат кўрсатиш учун "Agro Tech Klaster”нинг ҳар бир ҳудудий бўлинмаси 7-10 тадан мобил сервис хизмат кўсатиш бригадалари билан таъминланади, биринчи босқичда уларнинг умумий сони 100 тага етказилиши режалаштирилган. Бригадаларни жўнатиш барча зарурий асбоб-ускуналар ва мосламалар билан махсус жиҳозланган Chevrolet Damas автомобилларида амалга оширилади.

Қишлоқ хўжалиги техникасига хизмат кўрсатишга ихтисослашган автомобиллар билан бир қаторда аҳолига хизмат кўрсатиш ва уй-жой коммунал хизматлари учун мўлжалланган Damas автомобиллари ҳам намойиш этилди. Махсус асбоб-ускуналар билан жиҳозланган ихчам автомобиллар қийин жойларда янада мобил ва қулай хизмат кўрсатишга имкон беради.

Шунингдек, давлатимиз раҳбарига истеъмолчиларга қулайлик яратиш ва хизмат кўрсатиш самарадорлигини ошириш мақсадида ишлаб чиқилган “Agro Tech Klaster” мобил иловаси тақдим этилди. Ушбу рақамли ечим қишлоқ хўжалиги техникасини сотиб олиш, субсидиялар олиш учун ариза бериш, эҳтиёт қисмларни буюртма қилиш, кол-марказга мурожаат қилиш каби кенг қамровли имкониятларни беради.

“Agro Tech Klaster” лойиҳасининг амалга оширилиши фермер хўжаликлари учун хизматлар турларини сезиларли даражада кенгайтириш, барча ҳудудларда қишлоқ хўжалиги техникаларига тезкор ва сифатли хизмат кўрсатишни таъминлаш имконини беради.

Реклама ҳуқуқи асосида

.
Мақолага баҳо беринг
Баҳолаганлар: 84
Рейтинг: 3.1
t
×