Укасининг ғалабасига $100 000 атаган Фьюри қурумсоқликда айбланди

Спорт 7760
image

Бокс бўйича оғир вазн тоифасида WBC йўналиши чемпиони Тайсон Фьюри америкалик блогер-боксчи Жек Полни ютиши учун укаси Томми Фьюрига 100 минг доллар тикишга тайёр. Бу ҳақда “Boxing Scene” нашри хабар берди.

Тайсоннинг ушбу сўзларидан хабар топган Жек Пол 100 минг доллар жуда кам пул эканлигини ва кўпроқ пул тикишни таклиф қилди.

“Ўтган йили 40 миллион доллар ишлаб топган Тайсон Фьюри укасига 100 минг доллар тикишга тайёр. Худойим, қўрқувдан титраяпсиз. Эй Тайсон, сиз 40 миллион доллар йиғдингиз. Биламан, бу меникичалик кўп эмас. Лекин келинг, биргаликда пул тикамиз. Бир миллион, икки ёки уч миллион тикишга тайёрмисиз? Мен хоҳлаганингизча пул тикаман. Келинг буни бажарамиз. Сиз мен билан биргамисиз? Келинг, келишув тузамиз”, деган блогер-боксчи Пол.

YouTube юлдузининг бундай чорлови Тайсоннинг жаҳлини чиқарди ва у Полда миллион доллар пул йўқлигини иддао қилди.

“Эй Жеки болакай, эшитишимча, сен юз мингдан ортиқ пул тикмоқчи экансан? Катта пул тикишни хоҳлайсанми? Кўнглинг миллион доллар тусаб қолдими? Кел буни биргаликда амалга оширамиз. Сен миллион хоҳлаяпсанми? Албатта, шу пулни оласан. Лекин Жеки, мен ўша миллионни нақд кўрмоқчиман, чунки мен сенда миллион доллар йўқ деб ўйлайман. Айтганча, мен крипто ҳақида гапирмаяпман. Мен ҳақиқий Америка яшил долларлари ҳақида гапиряпман. Ҳақиқий АҚШ доллари, крипто эмас”, деган “лўлилар қироли”.

Маълумот учун, Жек Пол ва Томми Фьюри ўртасидаги жанг жорий йилнинг 6 август куни Нью-Йоркда бўлиб ўтади.

Маъруф Абдумаликов

.
Мақолага баҳо беринг
Баҳолаганлар: 248
Рейтинг: 3
t
×