UFC президенти янги йил арафасида қўйган “томоша”сига изоҳ берди

UFC президенти Дана Уайт Мексикадаги тунги клубда рафиқаси билан жанжаллашиб қолди. Ушбу ҳолат тасвирланган видео ижтимоий тармоқларда тарқалди.

Воқеа 31 декабрь куни Мексикадаги тунги клубда содир бўлган. Эр-хотин маст ҳолатда бўлган. Уайт хотинига нималарнидир айтган, шундан сўнг хотини унга тўсатдан шапалоқ урган, натижада эр-хотин ўртасида катта жанжал келиб чиққан.

UFC раҳбари бўлган воқеага ижтимоий тармоқлардаги саҳифасида изоҳ берди.

"Мен доим эркак кишида аёлни уриш учун ҳеч қандай ҳақ йўқ деб ҳисоблайман, бу жуда уятли ҳолат бўлди, аёлингизга қўл кўтарманг", дейди Дана.

Дананинг аёли Анна Уайт ҳам вазиятга изоҳ берди.

“Дана билан турмуш қурганимизга қарийб 30 йил бўлди. Бунга ўхшаш ҳолат аввал бўлмаган. Афсуски, янги йил арафасида иккаламиз ҳам жуда кўп ичдик ва вазият ҳар икки томонда ҳам назоратдан чиқди. Буни оилавий муҳокама қилдик ва бир-биримиздан кечирим сўрадик. Умид қиламанки, одамлар бизнинг шахсий ҳаётимизни фарзандларимиз учун ҳурмат қилади”, дейди Анна.

Маълумот учун, Дана ва Анна 1996 йилда турмуш қурган. Уларнинг уч нафар фарзанди бор.