Туркиялик 55 ёшли аёл Трамп отаси эканини даъво қилиб, уни судга берди (видео)

Туркиянинг Анқара шаҳрида яшовчи Нежла Озмен Америка Қўшма Штатларининг 79 ёшли Президенти Дональд Трамп биологик отаси эканини даъво қилиб, судга мурожаат қилди. Бу ҳақда қатор турк нашрлари хабар бермоқда.

Қайд этилишича, Озмен 2025 йилнинг 25 сентябрь куни Анқара 27-оилавий судига оталикни аниқлаш бўйича даъво аризаси топширган. Суд 10 октябрь куни даъвони рад этиб, аризада Трампнинг биологик ота эканини тасдиқловчи аниқ ва ишончли далиллар келтирилмаганини маълум қилди. Суд қарорида даъво моҳиятига оид жиддий камчиликлар мавжудлиги, уларни бартараф этиш учун муддат бериш ҳам мумкин эмаслиги билдирилган.

Мурожаатчи суд қароридан норози эканини билдириб, ишни апелляция тартибида кўриб чиқишни сўраганини, шунингдек АҚШ элчихонаси ва АҚШдаги судларга ҳам мурожаат қилганини айтмоқда.

Озменнинг сўзларига кўра, у 1970 йилда туғилган бўлиб, ҳужжатларда Сати ва Дурсун Озменнинг фарзанди сифатида қайд этилган. У расмий ҳужжатларда отаси сифатида кўрсатилган Дурсун Озмен унинг ҳақиқий отаси эмаслигини, биологик отаси эса Дональд Трамп эканини иддао қилди. Аёлнинг айтишича, уни тарбиялаган она 2017 йилда асл ҳақиқатни очиқлаб, Озменнинг биологик онаси никоҳсиз муносабат оқибатида Трампдан ҳомиладор бўлганини билдирган. Шу сабабли у ДНК тести ўтказилишини талаб қилмоқда.

Нежла Озмен Трамп билан шахсан учрашишни исташини айтиб, ундан фақат биологик отаси эканлиги ёки эмаслигини аниқлашни хоҳлашини таъкидламоқда.

Эслатиб ўтамиз, аввалроқ Elon Musk Junior ники билан рўйхатдан ўтган Кенияда яшовчи X ижтимоий тармоқ фойдаланувчиси америкалик миллиардер Илон Маскнинг ўғли эканини даъво қилиб чиққан эди.