Туркияда компьютер ўйинидан “илҳомланган” йигит беш одамни пичоқлади (видео)

Туркиянинг шимоли-ғарбидаги Эскишеҳир шаҳрида жойлашган масжидлардан бирининг олдида бронежилет ва дубулға кийган ниқобли йигит бир неча кишини пичоқлади. Бу ҳақда “Eskisehir Durum” хабар берди.

Гумонланувчи 18 ёшда бўлиб, дубулға ва ўқ ўтказмайдиган жилет кийган ҳолда 5 кишини пичоқлаган. Масжид олдида содир этилган ҳодиса оқибатида жабрланувчиларнинг барчаси оғир жароҳатлар билан шифохонага юборилган. Баъзи оммавий ахборот воситалари ҳужум оқибатида 7 киши жароҳатланганини ёзмоқда.

“Одамларга ҳужум қилган йигит компьютер ўйинидаги қаҳрамонга ўхшаб ўқ ўтказмайдиган жилет ва дубулға кийган, юзи ниқоб билан ўралган эди”, дея ёзган нашр.

Х ижтимоий тармоғи орқали жонли эфирга узатилган ушбу воқеа сабабчиси полиция томонидан қўлга олинган. Йигит ўз ҳаракатининг сабабларини очиқламаган, лекин у ўзига жанговар ўйинлар таъсир қилганини айтган.

Эскишеҳир расмийларига кўра, Бош прокуратура томонидан ҳозирда тергов ҳаракатлари олиб борилмоқда.

“Ҳужум оқибатида жабрланган фуқароларимизга тезроқ соғайиб кетишини тилаймиз”, дейилган шаҳар маъмуриятининг баёнотида.

Эслатиб ўтамиз, ўтган йили жазоирлик 17 ёшли ўсмир полиция томонидан отиб ташланганидан сўнг Францияда тартибсизликлар бошланган ва Президент Эммануэль Макрон бунда видеоўйинларни айблаганди. Макрон намойишларда қатнашганларнинг учдан бир қисми вояга етмаганлар экани ҳамда улар бунда компьютер ўйинларидан “илҳомланаётганини” айтганди.