Туркияда 101 млн тонна вайрона қолдиқлари ва чиқиндилар ҳосил бўлди (фотогалерея)

Туркия февраль ойидаги зилзилалардан кейин 101 миллион тонна чиқинди ва вайрона қолдиқларини олиб ташлаш ишларини бошлаб юборди. Бу ҳақда “Ҳуррият” газетаси хабар берди.

Туркия Атроф-муҳит, шаҳарсозлик ва иқлим ўзгариши вазирлигига кўра, 6 февраль куни содир бўлган зилзилалардан кейин қолган вайроналар ва қолдиқлар ҳажми тахминан 46 миллион куб метрни ташкил этган.

Биргина Ҳатай вилоятининг жанубида 16 миллион тоннадан ортиқ чиқинди олиб ташланади. Расмийларнинг айтишича, камида 2,5 миллион тонна ахлат ва қолдиқларни қайта ишлашга юбориш мумкин.

Атроф-муҳитни муҳофаза қилиш вазирлиги, шунингдек, ҳаво ифлосланишини истисно қилиш учун иш жойида асбест мавжудлиги ва миқдорини доимий равишда текширади.

Шунингдек, қаттиқ шикастланган ва вайрон бўлган уйларда яшаган аҳоли ўзларининг қимматбаҳо буюмларини қайтариб олишлари мумкин бўлади. Улар биринчи навбатда вайроналар остидан чиқарилиб, эгаларига топширилади.