“Туркия – бир юрак” акциясида 6 млрд 106 миллион АҚШ доллари хайрия йиғилди

Туркия ҳукумати ҳузуридаги Фавқулодда вазиятларнинг олдини олиш ва оқибатларини бартараф этиш бошқармаси (AFAD) операция ҳудуди эҳтиёжлари учун маблағ йиғиш учун инсонпарварлик кампаниясида фаол иштирок этган фуқаролар ва ташкилотларга миннатдорлик билдирди. Акция “Туркия – бир юрак” шиори остида ўтказилди. 

“Зилзилалар оқибатлари фонида Ҳукумат ва халқ йиғилиб, ҳақиқий ҳамжиҳатлик ва бирдамлик намунасини намойиш этди”, дея таъкидлади идора.  

Гап шундаки, кеча, 15 февраль оқшомида Туркия, Озарбайжон ва Шимолий Кипр Турк Республикасининг барча теле ва радио каналларида ҳамкорликдаги жонли эфирда Фавқулодда вазиятларнинг олдини олиш ва оқибатларини бартараф этиш бошқармасининг зилзилада жароҳатланганлар ва қурбонларга ёрдам акцияси дастури намойиш этилди. AFAD марказий биносидан эфирга узатилган дастурда таниқли актёрлар ва қўшиқчилар, бошловчилар иштирок этди ва улар қўнғироқларга жавоб берди. 

“Бугун биз оғир кунларни бошдан кечирамиз, аммо ишончимиз комилки, юртдошларимизнинг бирдамлиги ва ҳамжиҳатлиги туфайли яраларни даволаймиз. Бир кун аввал Туркия, Озарбайжон ва Шимолий Кипр Турк Республикаси теле ва радиоканалларида бир вақтда намойиш этилган “Туркия бир юрак” номли маблағ йиғиш акцияси ҳамжиҳатлигимизнинг ёрқин намунаси бўлди”, дейди AFAD. 

16 феврал соат 03:10 ҳолатига кўра, ҳамкорликдаги жонли эфирда йиғилган хайрия миқдори 115,1 миллиард лирага (6 миллиард 106 миллион АҚШ доллари)га етди. Табиий офат зонаси аҳолисига ёрдам кўрсатиш учун маблағ ўтказилганда 9 миллиондан ортиқ SMS-хабар келиб тушган. 

Эслатиб ўтамиз, 6 февраль эпимаркази Қаҳрамонмарашда 7 баллдан ортиқ (маҳаллий вақт билан соат 04:17 да – 7,7 балл ва 13:24 да – 7,6 балл) бўлган иккита зилзила содир бўлди. 

Президент Ражаб Тойиб Эрдўған Туркияда табиий офат қурбонлари муносабати билан етти кунлик миллий мотам эълон қилди. Туркия давлат байроқлари бутун мамлакат бўйлаб яримга ҳилпиратилди. 

Вайронкор зилзила қўшни мамлакатларда, жумладан Сурия, Ливан, Шимолий Кипр Турк Республикаси, Кипр Республикаси ва Ироқда ҳам сезилди.