Тўқаев Россиянинг Александр Невский орденини олишдан бош тортди 

Қозоғистон раҳбари Қосим-Жомарт Тўқаев президентлик ваколати тугагунига қадар на маҳаллий, на хорижий мукофотларни қабул қилмасликка қарор қилди. Шу сабаб Александр Невский орденини ҳам қабул қилмади. Бу ҳақда  “Tengrinews” нашри хабар берди.

Қайд этилишича, Россия томони Қосим-Жомарт Тўқаевни Александр Невский ордени билан тақдирлашни таклиф қилган.

"Давлат раҳбари бундай орден берилгани учун миннатдорлик билдирди. Бироқ у президентлик ваколатлари тугагунга қадар ҳам ички, ҳам хорижий мукофотларни қабул қилмасликка қарор қилди. Шу сабаб, яқинда Бишкекка ташрифи чоғида Президент Тўқаев Қирғизистоннинг энг олий ордени “Биринчи даражали Манас"дан бош тортди”, дейди Президент матбуот котиби Руслан Желдибай.

Эслатиб ўтамиз, кеча, 17 июнь куни Россия Президенти Владимир Путин иштирокидаги Санкт-Петербург халқаро иқтисодий форумида Тўқаев Қозоғистон квази-давлат, яъни ўзини ўзи мустақил деб эълон қилган Донецк ва Луганск Халқ Республикаларини тан олмаслигини айтганди.