Трамп сочи кўринмаган сурат учун журнални танқид қилди

АҚШ Президенти Дональд Трамп “Time” журналининг муқовасидаги суратида сочи кўринмагани учун нашрни танқид қилиб, ўша расмни “барча замонлардаги энг ёмон”, деб атади. Бу ҳақда у ўзининг Truth Social ижтимоий тармоқдаги саҳифасида ёзиб қолдирди.

Маълумотларга кўра, жорий йилнинг 13 октябрь куни Американинг “Time” журнали ўзининг янги сонини Вашингтон воситачилигида Исроил ва ҲАМАС ўртасидаги тинчлик келишувига бағишлаган. Журналда “Унинг ғалабаси” деб номланган мақола чоп этилиб, муқовада  АҚШ Президенти Дональд Трампнинг сурати илова қилинган.

“Time” журнали мен ҳақимда яхши мақола ёзибди, лекин расм барча замонларнинг энг ёмони бўлса керак. Бу суратда сочларим кўринмаяпти, бошимнинг тепасида эса сузувчи тожга ўхшаган нарса бор, фақат жуда кичкина. Ҳақиқатан ҳам ғалати. Мен ҳеч қачон пастки бурчакдан суратга олишларини ёқтирмасдим”, деб ёзган Трамп.

Қайд этиш жоиз, жорий йилнинг 13 октябрь куни АҚШ Президенти Дональд Трамп Ғазодаги уруш тугаганини эълон қилди. Журналистларнинг икки йиллик можаро тугадими, деган саволига у “Ҳа” деб жавоб берган ва минтақадаги вазият барқарорлашишига ишонч билдирган.

Эслатиб ўтамиз, аввалроқ АҚШ Молия вазирлиги мамлакатнинг 250 йиллик юбилейи муносабати билан АҚШ Президенти Дональд Трамп тасвирланган 1 долларлик танга ишлаб чиқаришни режалаштираётган эди.

Бунёд Келдибоев