Tojikistondagi Somoniy muzligining katta qismi parchalanib ketdi (video)

Tojikistonda Ismoil Somoniy muzligidan yirik parcha ajralib tushdi. Hodisa joriy yilning 25 oktyabr kuni soat 11:00 atrofida Tojikobod tumani hududidagi Safedobi qishlog‘i yaqinida yuz bergan. Bu haqda mamlakat Favqulodda vaziyatlar qo‘mitasiga (FVQ) tayanib, “Asia-Plus” xabar berdi.

Qo‘mita ma’lumotiga ko‘ra, ajralib tushgan muz massasi taxminan 2 kilometr uzunlikda, 25 metr balandlikda va 200 metr kenglikda bo‘lib, daraga qarab pastga siljigan. Mahalliy vaqt bilan soat 14:00 ga borib vaziyat barqarorlashgan, aholiga to‘g‘ridan to‘g‘ri xavf yo‘q.

Halok bo‘lganlar va jiddiy vayronagarchiliklar qayd etilmagan. Biroq mutaxassislar uzoq davom etayotgan yomg‘irlar va yangi muz bo‘laklarining ajralib tushish ehtimoli sababli suv toshqinlari hamda ko‘chkilarning yuzaga kelish xavfi borligidan ogohlantirmoqda. Ayniqsa, Gulrez qishlog‘i atroflarida bu holat qishloq xo‘jaligiga zarar yetkazishi mumkin.

FVQ ma’lumotiga ko‘ra, qo‘mita xodimlari muzlikni kuzatishda davom etmoqda va yaqin atrofdagi aholi punktlariga bo‘lgan potentsial xavflarni baholamoqda.

Eslatib o‘tamiz, avvalroq BMTning Atrof-muhit bo‘yicha dasturi yer yuzida iqlim o‘zgarishlari nafaqat issiq to‘lqinlarni, balki yana bir qancha xavfli oqibatlarni keltirib chiqarishi, jumladan, muzliklarning erishi bilan qadimiy viruslar uyg‘onishi va toshqinlar sababli o‘nlab yillar avval paydo bo‘lgan zaharli kimyoviy moddalar tabiatga chiqishi mumkinligi haqida xabar bergan edi.