Тошкентда нотўғри “парковка” учун чоралар кескинлашди

Тошкентда нотўғри “парковка” қилганларга нисбатан чоралар кескинлаштирилиб, тўхташ тақиқланган жойларда қолдирилган автомобиллар эвакуватор ёрдамида жарима майдонларига олиб кетилади. Бу ҳақда Йўл ҳаракатини ташкил этиш маркази (ЙҲТЕМ) хабар қилди.

Маълум қилинишича, шаҳарнинг турли ҳудудларида автомобиллар кўпинча пиёдалар йўлакларида, пиёдалар ўтиш жойлари яқинида, жамоат транспорти бекатларида, яшил ҳудудларда, шунингдек, тўхташ ёки тўхтаб туриш тақиқланган жойларда қолдирилмоқда. ЙҲТЕМга кўра, бундай ҳолатлар аҳолининг кундалик қулайлигига бевосита таъсир кўрсатади. Улар пиёдаларнинг эркин ҳаракатланишига тўсқинлик қилади, кекса ёшдаги фуқаролар, болалар аравачасидаги ота-оналар, ногиронлиги бўлган шахслар ва болалар учун ноқулайлик туғдиради, шунингдек, жамоат транспорти ҳамда махсус техникалар ҳаракатини қийинлаштиради.

Шу муносабат билан Тошкентда автотранспорт воситаларининг тўхташи ва тўхтаб туриши қоидаларига риоя этилиши устидан назоратни кучайтириш тизимли амалиётга айлантирилмоқда. Қайд этилишича, қоидабузарлик билан қолдирилган транспорт воситалари белгиланган тартибда эвакуация қилиниб, ихтисослаштирилган жарима майдончаларига жойлаштирилади.

ЙҲТЕМнинг маълум қилишича, мақсад жазолаш эмас, балки тартиб-интизомни таъминлашдан иборат.

“Бу борадаги ишлар давом эттирилади ва янада кучайтирилади. Ушбу чораларнинг мақсади – жарима қўллашнинг ўзи эмас, балки барча шаҳар аҳолиси ва ҳаракат иштирокчилари учун тартиб, хавфсизлик ҳамда нормал шароитларни таъминлашдир”, дейилади Марказ ахборотида.

ЙҲТЕМ ҳайдовчиларни тўхташ ва тўхтаб туриш жойини танлашда йўл ҳаракати қоидаларига қатъий риоя қилиши кераклигини билдирган. Хусусан, автомобилларни пиёдалар йўлакларида, бекатларда, пиёдалар ўтиш жойлари яқинида, яшил ҳудудларда ҳамда одамлар, жамоат транспорти ёки махсус техникалар ҳаракатига халақит берадиган ёхуд хавфсизликка таҳдид туғдирадиган бошқа жойларда қолдиришдан қайтарган.