Мусобақа вақтида жанжаллашган ҳакам ва тренерлар бир неча йилга спортдан четлатилди

Спорт

image

Ижтимоий тармоқларда Тошкент шаҳридаги “Универсал” спорт саройида бўлиб ўтаётган каратэ бўйича ўсмирлар, ёшлар ва катталар ўртасидаги Ўзбекистон кубоги мусобақасида ҳакам ва тренерлар ўртасида жанжал чиққани ҳақида хабарлар тарқалди. Ўзбекистон Республикаси Жисмоний тарбия ва спорт вазирлиги мазкур ҳолат юзасидан расмий маълумот берди.

Унга қайд этилишича, жорий йилнинг 16 октябрь куни соат тахминан 17:00ларда “Универсал” спорт саройида бўлиб ўтаётган каратэ бўйича ўсмирлар, ёшлар ва катталар ўртасидаги Ўзбекистон кубоги мусобақасида низоли ҳолат келиб чиққан. Унда мусобақа ҳаками Бўриев Азизбек Эшбоевич, Тошкент вилояти “Чемпион” каратэ спорт клуби тренери Юсупов Дилшод Маърупович ҳамда Сурхондарё вилояти каратэ миллий федерацияси тренери Исматуллаев Абдулазиз Иноятуллаевичлар ўртасида мусобақа якуний натижаси юзасидан ўзаро тортишув келиб чиққан. Мазкур келишмовчилик оқибатида бирон бир шахс тан жароҳати олмаган. Ушбу ҳолат юзасидан Ўзбекистон каратэ миллий федерацияси раёсати юқоридаги спорт мутахассисларига нисбатан хизмат текшируви тайинлади.

Текширув якуни юзасидан Ўзбекистон каратэ миллий федерацияси ҳаками Бўриев А.Э.ни икки йилга ҳакамлик иш фаолиятидан четлаштириш, Сурхондарё вилоят каратэ миллий федерацияси тренери Исматуллаев А.И.ни уч йилга ва Тошкент вилояти “Чемпион” каратэ спорт клуби тренери Юсупов Д.М.ни икки йилга тренерлик фаолиятидан четлаштириш ҳақида қарор қабул қилинди. Мусобақа бош ҳаками Қорабоев Қосимжон Ҳошимовичга эса ҳайфсан эълон қилинди.

Ўз навбатида Ўзбекистон Республикаси Жисмоний тарбия ва спорт вазирлиги мазкур ҳолат иштирокчиси, каратэ бўйича Ўзбекистон ўсмирлар миллий терма жамоаси катта тренери ҳамда олий тоифали тренер (2018 йил 19 ноябрдаги 985-сонли буйруқ, гувоҳнома рақами №0158) Бўриев А.Э. Вазирлар Маҳкамасининг 2012 йил 14 июндаги 173-сон қарори билан тасдиқланган Спорт терма жамоалари тўғрисидаги низомга кўра маънавий-ахлоқий ва бошқа нормаларни бузганлиги сабабли миллий терма жамоа таркибидан чиқарилди.

Ўзбекистон Республикаси Жисмоний тарбия ва спорт вазирлиги мазкур ҳолатни ўз назоратига олган.


Мақола муаллифи

Теглар

жанжал каратэ Ўзбекистон кубоги

Баҳолаганлар

59

Рейтинг

3

Мақолага баҳо беринг

Дўстларингиз билан улашинг