Тошкентда фуқаролардан 6,1 млрд сўмни алдаб олган “автосалон эгалари” қамалди 

Фуқаролардан 6 млрд 155 млн сўмни алдаб олган “автосалон эгалари” қамалди. Бу ҳақда ЎзА хабар берди.

Маълум бўлишича, олдиндан жиноий тил бириктирган 3 нафар шахс томонидан пойтахтнинг Алишер Навоий кўчасида “My-Cars” номи билан автосалон очилган.

2022 йил 16 январдан 2023 йилнинг 2 август кунига қадар бўлган вақт оралиғида ушбу жиноий шериклар “автомашиналарни 3 ой муддат ичида автосалондан чиқариб, етказиб бериш”ни айтиб, жами 74 нафар фуқаронинг 40 млн сўмдан то 200 млн сўмгача бўлган жуда кўп миқдордаги, жами – 6.155.000.000 сўмлик пул маблағларини фирибгарлик йўли билан қўлга киритган.

Харидорларни қабул қилишда эса улар гўёки “GM Uzbekistan” билан  шартнома тузганликларини айтиб алдашган. 

Жиноят ишлари бўйича Шайхонтоҳур туман суди Жиноят кодексининг 168-моддасининг тегишли бандлари билан айбланувчиларга 8-9 йилгача озодликдан маҳрум этиш жазосини тайинлади.