Топурия Махачевни Оқ уй жангидан қочганликда айблади

UFC енгил вазн тоифаси чемпиони Илия Топурия ижтимоий тармоқларда жорий йилнинг 14 июнь куни Оқ уйда ўтказилиши режалаштирилган турнир олдидан Ислом Махачевни жангдан қочганликда айблаб, танқид қилди. Бу ҳақда Топурия Х саҳифасида маълум қилди.

Топуриянинг сўзларига кўра, россиялик жангчи бу сафар ҳам жангдан четга чиқиш учун баҳона топган – бу гал жароҳат. Оқибатда Топуриянинг рақиби сифатида Жастин Гэйтжи октагонга чиқадиган бўлди.

“Ислом яна бир баҳона топди. Бу сафар жароҳат. Мен ҳар доим Оқ уйда ўтказиладиган тадбирда қатнашишимни билардим. Ниҳоят, улар менга у ерда жанг қилишимни айтишганда Ислом ҳақида гапиришди ва мен бир сония ҳам иккиланмадим. Аммо уйғонганимда Исломнинг жароҳат олганини билдим. Кейин Жастин Гэйтжи пайдо бўлди. Яна бир бор Исломнинг қочиши учун бошқа биров жавоб беради”, дея ёзади Топурия.

Жорий йилнинг 9 март куни UFC президенти Дана Уайт UFC 326 турниридан кейинги матбуот анжуманида Махачев ва Топурия ўртасидаги жанг Оқ уй учун режалаштирилгани ҳақидаги хабарларни рад этганди.

Шунингдек, Уайт Махачевнинг ҳақиқатан ҳам жароҳат олганини тасдиқлади. 

“Унинг қўлида муаммо бор. Бу қанчалик жиддийлигини ёки қачон қайтишини аниқ билмайман, аммо у жароҳат олган”, деган эди у.

Жорий йилнинг 8 март куни Оқ уйда ўтказиладиган тадбир учун жанглар картаси эълон қилинган эди. Турнир доирасида олтита жанг, жумладан, иккита чемпионлик жанги режалаштирилган: енгил вазн тоифасида Топурия ва Гэйтжи ҳамда вақтинчалик оғир вазн чемпионлиги учун Сирил Ган ва Алекс Перейра ўртасидаги жанг.

Маълумот учун, Топурия 2025 йил июль ойида Махачев томонидан бўшатилган чемпионлик камарини қўлга киритган.