“Tolibon” narkotik ustidan g‘alaba qozonganini e’lon qildi

Afg‘onistondagi “Tolibon” muvaqqat hukumati matbuot kotibi Zabihullo Mujohid mamlakatda narkotik ishlab chiqarish va uning noqonuniy savdosi nol darajaga yetkazilganini ma’lum qildi. Bu haqda “Tolo News” xabar berdi.

“Biz barcha turdagi narkotik moddalar kontrabandasining oldini olyapmiz. Afg‘onistonda ularning ishlab chiqarilishi butunlay tugatilgan. Giyohvand moddalar yetishtirish va noqonuniy aylanishi deyarli nolga tushdi”, dedi Mujohid.

Uning so‘zlariga ko‘ra, bu shuni anglatadiki, agar ilgari mamlakatda giyohvand moddalar kontrabandasiga oid muammo bo‘lgan bo‘lsa, hozirda u “tabiiy ravishda o‘z yakuniga yetmoqda”.

Bunga javoban Eron Ichki ishlar vaziri o‘rinbosari Ali Akbar Purjamshidiyan Eronning sharqiy chegaralarida, ya’ni Pokiston va Afg‘oniston bilan chegaradosh hududlarda giyohvand moddalar savdosi va xavfsizlik muammolari oshganini ta’kidlab, xavotir bildirgan. Uning aytishicha, Afg‘onistonda hanuz katta miqdorda giyohvand moddalar zaxiralari mavjud.

“Garchi Afg‘oniston rahbariyati giyohvand moddalar yetishtirish va ko‘knorini ekishni taqiqlagan bo‘lsa ham biz Afg‘onistonda katta miqdorda narkotik moddalar zaxiralari mavjudligiga ishonamiz. Ular sharqiy chegaralar orqali Eronga olib o‘tilmoqda. Bu esa bizning chegara xavfsizligimizga, milliy xavfsizligimizga va ijtimoiy barqarorligimizga ta’sir qilmoqda”, dedi Purjamshidiyan.

Eslatib o‘tamiz, avvalroq “Tolibon”ning narkotik moddalar bilan kurash bo‘limi vakili Abdul Rahmon Qosimiy mamlakat aholisining kamida 10 foizi giyohvandlikdan aziyat chekayotganini bildirgan edi. Qosimiyning so‘zlariga ko‘ra, Afg‘onistonda giyohvand odamlarga yordam berish bo‘yicha davolash dasturi amalga oshirilmoqda va uning natijalari umidbaxsh. Xususan, so‘nggi bir yil ichida yordam so‘rab murojaat qilgan 100 ming kishidan 95 foizi sog‘ayishga muvaffaq bo‘lgan.