Мудҳиш ЙТҲда 14 киши, жумладан 6 журналист вафот этди

Кеча, 11 январь куни Танзания шимолида енгил автомобиль ҳамда микроавтобус иштирокида йўл-транспорт ҳодисаси юз берди. Оқибатда тахминан 14 нафар одам ҳалок бўлган. Қурбонлар орасида 6 нафар журналист ҳам борлиги айтилмоқда. Бу ҳақда ТАСС хабар берди.

Қайд этилишича, журналистлар Симийю вилоятига танишув саёҳатини амалга ошираётган бўлган. Аммо тўсатдан уларнинг машинаси микроавтобус билан тўқнашиб кетган. Оқибатда11 киши воқеа жойида, яна уч киши шифохонада вафот этган.

Хабарга кўра, ЙТҲ оқибатида ITV телеканалининг икки нафар ходими, икки нафар жамоатчилик билан алоқалар мутахассислари, “Habari Leo” нашри ишчиси ва уларнинг ҳайдовчиси ҳаётдан кўз юмган.

Мамлакат Президенти Самия Сулуху Ҳасан ўзининг Twitter саҳифасида ҳалок бўлганларнинг оила аъзоларига ҳамдардлик билдирди.
 
“Мен Мванза автоколланасидаги машинанинг йўналиш таксиси билан тўқнашуви оқибатида 14 нафар одамнинг, хусусан 6 нафар журналистнинг ўлимидан чуқур қайғудаман. Ҳалок бўлганларнинг оила аъзоларига, журналистларга ҳамдардлик билдираман”, деган Президент.

Таъкидланишича, йўл-транспорт ҳодисасига нима сабаб бўлгани ва у қандай шароитда келиб чиққани полиция томонидан аниқлаштирилмоқда.