Tabiiy resurslar va ekologiya vaziri hibsga olindi

Qirg‘izistonning sobiq Tabiiy resurslar, ekologiya va texnik nazorat vaziri Dinara Qutmanova qo‘lga olinib, tergov izolyatoriga joylashtirildi. Bu haqda Milliy xavfsizlik davlat qo‘mitasi matbuot xizmati xabar berdi. 

Qayd etilishicha, sobiq amaldor Tabiiy resurslar vazirligidagi asosiy mafkuraviy ilhomlantiruvchi va korrupsiya faktlarining asosiy tashkilotchisi hisoblanadi. 

Tergov dalillarga, jumladan, korrupsion sxemalarning boshqa ishtirokchilarining ko‘rsatmalariga, shuningdek, sobiq vazir va boshqa ayblanuvchilar ishtirokidagi qarama-qarshiliklar natijalariga asoslangan. 

“Dinara Qutmanova vazir lavozimida o‘ziga berilgan barcha vakolatlarga ega bo‘lgan holda, oliy hokimiyat tomonidan bildirilgan ishonchga qaramay, shaxsiy ambitsiyalari va g‘arazli manfaatlarini ko‘zlab, ajratilgan davlat pullarini noqonuniy olib chiqib ketish bo‘yicha keng ko‘lamli korrupsiya tarmog‘ini tashkil qilgan”, deyiladi xabarda. 

Milliy xavfsizlik davlat qo‘mitasi ma’lumotlariga ko‘ra, sobiq vazir tabiatni muhofaza qilish va ekologiya sohasidagi uydirma loyihalarni moliyalashtirish uchun ariza topshirishga taqlid qilish maqsadida nafaqat o‘zining qo‘l ostidagi xodimlarini, balki qarindoshlarini (o‘g‘li va singlisi), shu jumladan, yaqin atrofidagilar (uy xizmatchisi, o‘g‘lining  do‘sti va boshqalar)ni ham noqonuniy korrupsion harakatlarga jalb qilgan. 

Ma’lumot uchun,  uch yil davomida jami moliyalashtirish hajmi qariyb 969 million 568 ming somni tashkil etgan bo‘lsa, shundan 180 million somi Tabiiy resurslar vazirligi ehtiyojlari uchun davlat xaridlariga, 789 million 568 ming somi jismoniy va yuridik shaxslarga tabiatni muhofaza qilish va asrash bo‘yicha 110 ta loyiha doirasida ajratilgan. 

Jinoyat ishi doirasida jami 9 nafar shaxs ayblanuvchi sifatida jalb etilgan. Sobiq vazirning o‘g‘li xalqaro qidiruvda bo‘lib, uni Turkiyadan deportatsiya qilish choralari ko‘rilmoqda. 

Dinara Kutmanova qo‘lga olinib, Qirg‘iziston Respublikasi Milliy xavfsizlik davlat qo‘mitasining tergov izolyatoriga joylashtirildi.

Shu kabi boshqa faktlarni aniqlash bo‘yicha tergov-tezkor tadbirlari davom etmoqda. 

Avvalroq Tabiiy resurslar vazirligining sobiq rahbari Dinara Qutmanova “24.kg” agentligiga uning o‘g‘li Kemelbek Istanbulda o‘g‘irlab ketilgani haqida xabar bergan. Uning so‘zlariga ko‘ra, o‘g‘li uchun 600 ming dollar tovon talab qilingan. Ichki ishlar vazirligi Dinara Qutmanova bergan ma’lumotni rad etdi. 

22 iyul kuni Milliy xavfsizlik davlat qo‘mitasi matbuot xizmati Tabiiy resurslar vazirligi va “Tabiatni rivojlantirish jamg‘armasi” jamg‘armasidagi korrupsiya bo‘yicha qo‘zg‘atilgan jinoyat ishi doirasida kimlar hibsga olingani, sobiq vazir Dinara Qutmanova va uning oilasi turli loyihalardan millionlarni qanday o‘zlashtirgani haqida ma’lumot berdi.

Dinara Kutmanova 2021 yilning 13 oktyabridan 2023 yil 15 martigacha Qirg‘iziston Respublikasi Tabiiy resurslar, ekologiya va texnik nazorat vaziri lavozimida faoliyat yuritgan va Hukumatdagi yagona ayol vazir bo‘lgan.