Сулҳ Ливанга тааллуқли эмас – Нетаньяху

АҚШ ва Эрон ўртасидаги икки ҳафталик ўт очишни тўхтатиш тартиби Ливанга тааллуқли эмас. Бу ҳақда бугун, 8 апрель куни Исроил Бош вазири Биньямин Нетаньяхунинг идораси X ижтимоий тармоғида маълум қилди.

”Икки ҳафталик ўт очишни тўхтатиш Ливанни ўз ичига олмайди”, дейди Нетаньяху.

Вашингтон ва Теҳрон ўртасида асосий воситачи сифатида чиққан Покистон Бош вазири Шаҳбоз Шариф вақтинчалик сулҳ Ливанда ҳам амал қилишини таъкидлаган эди. 

“The Times of Israel”нинг хавфсизлик хизмати вакилига таяниб ёзишича, Исроилнинг “Ҳизбуллоҳ”га қарши операциялари тўхташидан дарак йўқ. Манбанинг сўзларига кўра, Исроил мудофаа армияси ўт очишни тўхтатиш ҳақидаги эълонга қарамай, Эронга зарбалар беришда давом этмоқда.

Кеча, 7 апрель куни АҚШ Президенти Дональд Трамп Эрон билан икки ҳафталик ўзаро ўт очишни тўхтатиш бўйича сулҳга эришилганини эълон қилди. Америка етакчисининг аниқлик киритишича, ушбу қарор Покистон Бош вазири Шаҳбоз Шарифнинг таклифи ҳамда “Эрон Ислом Республикасининг Ҳормуз бўғозини тўлиқ, зудлик билан ва хавфсиз тарзда очишга тайёрлиги” инобатга олинган ҳолда қабул қилинган. Эрон давлат телевидениесининг хабар беришича, Теҳрон ўт очишни тўхтатиш бўйича 10 та шартни илгари сурган ва АҚШ “уларга рози бўлишга мажбур бўлган”. Улар орасида ҳужум қилмаслик тамойили, Теҳроннинг Ҳормуз бўғози устидан назорати, Эрон ҳудудида уранни бойитиш, асосий ва иккиламчи санкцияларни бекор қилиш, товон пули тўлаш, Америка кучларини минтақадан олиб чиқиб кетиш каби шартлар бор. Шариф Эрон ва АҚШ делегацияларини “барча низоларни ҳал қилиш бўйича якуний келишувга эришиш” учун 10 апрель куни Исломободга музокаралар столига таклиф қилди. CNN телеканали хабарига кўра, Америка делегацияси таркибидан вице-президент Жей Ди Венс, президентнинг махсус элчиси Стив Уиткофф ва Трампнинг куёви Жаред Кушнер ўрин олади.