Шакири фаолиятини МЛСда давом эттириши мумкин

“Бавария” ҳамда “Ливерпуль” даги ўйинлари билан муҳлисларга яхши таниш бўлган Жердан Шакири “Чикаго Файр” жамоасига кўчиб ўтиши мумкин. Инсайдер Фабризио Романонинг хабар беришича томонлар аллақачон шартнома шартларини келишиб олишган.

Жорий мавсумни “Олимпик Лион” сафида ўтказаётган футболчи, 11 ўйинда иккита гол урган ва учта ассист амалга оширган. Мазкур трансфердан француз клуби 7 млн евро атрофида маблағ ишлаб олиши мумкин.

2009 йили катта футболга кириб келган швейцариялик футболчи шу кунгача икки мартадан Чемпионлар лигаси, Европа суперкубоги ҳамда Клублар ўртасидаги жаҳон чемпионати ғолибига айланган. Шунингдек, уч мартадан Швейцария чемпионати ва кубогини, 2 мартадан Германия чемпионат ва кубогини, бир марта Англия чемпионлигини қўлга киритган. Умумий 386 ўйинда 66 марта рақибалр дарвозасини ишғол қилган.

Маълумот учун, Шакири ўтиши кутилаётган Чикаго жамоаси ўтган мавсум МЛСда 34 ўйиндан сўнг 9 ғалаба, 7 дуранг ва 18 мағлубият қайд этиб, 34 очко тўплаган ҳолда якунда чемпионатни 22-ўринда якунлаган. 26 февралдан старт оладиган бу йилги МЛС баҳсларида “Чикаго Файр” жамоаси 1 турда Девид Бекхэмга тегишли “Интер Маями” жамоасига қарши баҳс олиб боради.

Наврўзбек Мамазиёев