Самарқандда ҳавони ифлослаб келган чўчқахона аниқланди (фото)

Самарқанд вилоятида ҳавони ифлослаб, чўчқа боқиб келган тадбиркор аниқланди. Бу ҳақда Махсус комиссия хабар берди.

Қайд этилишича, Самарқанд вилоятининг Пастдарғом туманидаги Камолот маҳалласи аҳли кечаси тарқаладиган ноодатий тутундан азият чекиб келган. Тутун қуюқ, ҳиди ўткир, атрофдаги ҳаво тун бўйи кетмайдиган даражада ифлосланган.

Маҳалла ва жамоатчиликнинг мурожаатидан сўнг туман ҳокимлиги ҳудудда ўрганиш олиб борган. Маълум бўлишича, “Исмоил Заҳро” МЧЖ автомашина баллонларини ёқиб, чорва моллари учун емиш тайёрлаб келган. Самарқанд шаҳрининг “Супер” ҳудудига яқин жойдаги бу ҳолатдан шаҳар аҳолиси ҳам азият чеккан.

Туман ҳокими ўринбосари Азиз Ғафуровнинг маълум қилишича, тадбиркор бу ҳудудни тўлиқ ёпиб олган, бир неча ой давомида ишчи гуруҳни ичкарига киритмаган. 3 декабрь куни ўтказилган ўрганишга мутасадди ташкилотларнинг барчаси жалб этилган. Натижада 40 сотихли ёпиқ ҳудудда тадбиркор чўчқа боқиб келаётгани аниқланган.

Туман ҳокимлиги бу ҳолат тезкорлик билан тўхтатилгани ва тегишли шахсларга нисбатан белгиланган тартибда ҳуқуқий чоралар кўрилишини билдирди.

Вилоят экология бошқармаси ахборот хизмати раҳбари Шерали Искандаровга кўра, тадбиркор 2 йил давомида бу ерда чўчқа боқиб келган. Ҳайвонларга озуқа тайёрлаш мақсадида кечаси машина баллонларини ёққан. Бизнес омбудсманга қилинган мурожаат ва ташкилот жавоб хатига асосан, тадбиркорга нисбатан қонунда белгиланган тартибда чора кўрилади.

Дастлабки маълумотларга кўра, корхона ушбу турдаги фаолият билан шуғулланиш учун экология органи ва санитария-эпидемиология марказидан рухсат олмаган.

Манбага кўра, чўчқаларни озиқлантириш эвазига ҳавони ифлослантириб келган “Исмоил Заҳро” МЧЖнинг 2024 йилдаги расмий айланмаси 400 минг сўм, 2025 йилда эса 1 млн сўм бўлган. Корхонанинг солиқ қарздорлиги эса 60 миллион сўмдан ортиқ.

Эслатиб ўтамиз, аввалроқ Тошкентда фильтр ўрнатмаган 10 та иссиқхона ёпилганди.