Rossiya “Tolibon”ni o‘z qanoti ostiga olmoqchi

G‘arb razvedka xizmatlari Afg‘onistonda “Tolibon”ga qarshi bo‘lgan tuzilmalarni qo‘llab quvvatlamoqda, bu sharoitda Rossiya “Tolibon” bilan aloqalarni zarur darajada ushlab turadi. Bu haqda bugun, 14 oktyabr kuni Rossiya Prezidenti Vladimir Putin “Rossiya-Markaziy Osiyo” sammitida aytib o‘tdi.

“G‘arb razvedka xizmatlari, birinchi navbatda, amerikalik va britaniyaliklar “Tolibon”ga qarshi bo‘lgan tuzilmalarni oziqlantirib, bu orqali ularni ba’zi mamlakatlarimiz chegaralarini o‘qqa tutishni maqsad qilgan. Biz bu bilan bog‘liq xavf va tahdidlardan xabardormiz va shuning uchun “Tolibon” harakati rahbariyati bilan aloqalarni zarur darajada ushlab turamiz”, deydi Putin.

Prezidentning so‘zlariga ko‘ra, Afg‘onistonda fuqarolar urushi qayta tiklanishining oldini olish manfaatlarimiz uchun foydali bo‘ladi. Shuningdek, u, bu mamlakatdagi vaziyatni qochqinlar oqimi va terrorchilik tahdidlari bilan to‘lib toshgan keskinlik o‘chog‘i deb atadi.

Bundan tashqari, iqtisodiy tanazzul sharoitida “Tolibon” hukumati Afg‘oniston uchun an’anaviy bo‘lgan daromadining ayrim turlariga, jumladan, giyohvand moddalar savdosiga rozi bo‘lishga majbur ekanini aytdi.

Qayd etilishicha, xorijiy razvedka xizmatlari bosimi ostida Afg‘onistonning shimolida “Tolibon” terroristlar qal’alari paydo bo‘lishiga ko‘z yummoqda. Jihodchilarning transchegaraviy aloqalari barcha uchun tahdid.

“Albatta, biz Afg‘onistondagi amaldagi hokimiyat bilan ishlashimiz kerak, siz mening pozitsiyamni bilasiz. Ammo bu bizning ushbu yo‘nalishdagi ishimizni sinchkovlik bilan tahlil qilish va muvofiqlashtirish mavzusidir”, deya xulosa qilib, Markaziy Osiyodagi hamkasblarini Moskva ushbu mavzu bo‘yicha ular bilan yaqin aloqada bo‘lishda davom etishiga ishontirdi.

Temur Jumayev