Россия шафқатсизлиги учун бадал тўлаши керак. 9-санкциялар пакети тайёр

Европа Комиссияси кеча, 7 декабрь куни Россияга қарши тўққизинчи санкциялар пакетини киритди, унда яна 200 га яқин жисмоний шахс ва корхоналар, учта банк, тўртта телеканал, ҳарбий-саноат комплексидаги компаниялар бор. Шунингдек, пакет икки мақсадли дронлар ва уларнинг компонентларини етказиб бериш бўйича экспорт чекловларини ҳам ўз ичига олади. Бу ҳақда Еврокомиссия раҳбари Урсула фон дер Ляйен видеомурожаатида айтиб ўтди. Бу санкциялар келаси ҳафта ЕИ Кенгаши томонидан тасдиқланиши керак. 

“Биз қора рўйхатга яна 200 га яқин одам ва бизнесни киритишни таклиф қиламиз”, дейди ЕК раҳбари. 

Унинг сўзларига кўра, Еврокомиссия “Россиянинг юқори мартабали ҳарбийлари, парламент аъзолари, губернаторлар, вазирлар, сиёсий партиялар ва компанияларни” қора рўйхатга киритишни режалаштирмоқда. Уларнинг исмлари ва компания номлари Европа Иттифоқи Кенгаши янги санкциялар пакетини маъқуллаганидан сўнг маълум бўлади ва у ЕИнинг расмий журналида чоп этилади. 

“Европа Комиссияси яна учта банкка нисбатан санкциялар жорий этишни, шу жумладан, Бутунроссия минтақавий тараққиёт банки учун транзакцияларни тўлиқ тақиқлашни ҳам таклиф қилди”, дейди Урсула фон дер Ляйен.

У,  шунингдек, “Россия ташвиқот машинаси”га зарба бериш орқали Европа Иттифоқидаги яна тўртта рус каналини ўчириб, уларни ва онлайн платформаларда трансляция қилишни тақиқлашга чақирди.

“Шунингдек, биз Россиянинг энергетика ва тоғ-кон саноатига нисбатан янги чекловларни, шу жумладан тоғ-кон саноатига инвестицияларни тўлиқ тақиқлашни таклиф қиламиз”, дейди у. 

Фон дер Ляйеннинг фикрича, Россия қишда Украинани музлатиб қўймоқчи.  

“Биз Украина томонида турибмиз ва Россияни шафқатсизлиги учун бадал тўлашга мажбурламоқчимиз”, дейди Еврокомиссия раҳбари, Европа Иттифоқининг аввалги саккизта санкциялар пакети Россия иқтисодиётига жиддий зарар етказганлиги ҳақидаги фикрни билдирар экан. 

Шу кунгача ЕИ Россия бўйлаб 1241 киши ва 118 компания ва ташкилотни қора рўйхатга киритган.