Россия қитъалараро баллистик ракетани синовдан ўтказди (видео)

Россия ҳарбийлари бугун, 12 апрель куни Астрахан вилоятидаги Капустин Яр полигонида қитъалараро баллистик ракетани синовдан ўтказди. Бу ҳақда Россия Мудофаа вазирлиги маълум қилди.

“Ушбу учирилиш истиқболли ракета тизимларини давлат синовидан ўтказиш, шунингдек, хизматдаги ракеталарнинг барқарорлигини тасдиқлаш доирасида амалга оширилди”, дейилади вазирлик  хабарда.

Қитъалараро баллистик ракета тизимини ишга тушириш Стратегик ракета кучлари жанговар экипажи томонидан амалга оширилган. Стратегик ракета кучлари Россия Қуролли кучларининг бўлими бўлиб, унинг стратегик ядровий кучларининг асосий таркибий қисмидир.

"Олинган натижалар Россия Федерациясининг стратегик хавфсизлигини таъминлаш учун Россия ракеталарининг юқори даражадаги ишончлилигини тасдиқлайди. Учириш мақсадлари тўлиқ бажарилди", дейилади баёнотда.

Қайд этиш жоизки, январь ойида Россия Мудофаа вазирлиги 2024 йилда Стратегик ракета қўшинлари қитъалараро баллистик ракеталар билан еттита ўқув ва синов учиришларни амалга оширишини эълон қилган. 2023 йил 16 декабрда Стратегик ракета қўшинлари қўмондони Сергей Каракаев Россия қитъалараро баллистик ракета ва сувости кемасидан учириладиган баллистик ракеталарнинг ҳар қандай режалаштирилган ишга туширилиши ҳақида АҚШни камида 24 соат олдин хабардор қилишини маълум қилган.

Расмий маълумотларга кўра, Капустин Яр полигонининг экспериментал синов базаси ва жанговар майдонлари Россия Федерациясининг тўртта вилоятида (Астрахан, Волгоград, Саратов ва Оренбург) ва Қозоғистоннинг бешта вилоятида (Ғарбий Қозоғистон, Ақтўбе, Қарағанда, Қизилўрда, Жалбил) умумий майдони тахминан 9,5 миллион гектар бўлган ер участкаларида жойлашган. Мудофаа вазирлиги Капустин Яр-Балхаш йўналишида миллий ракетага қарши мудофаа элементлари ва тизимлари синовдан ўтказилаётганини билдирган.