Рим папаси Россия ва Украинанинг ўртасига тушмоқчи

Папа тахти Россия ва Украина ўртасида музокараларни Ватиканда ўтказишни таклиф қилмоқда ва музокаралар олиб бораётган делегацияларнинг алоқаларида воситачи бўлишни хоҳлаяпти. Бу ҳақ “La Stampa” газетаси ёзмоқда.

Нашр Рим папасининг яқинда қилган баёнотига ишора қилган. Католик черкови раҳбари Ватикан ҳарбий можарони ҳал қилиш йўлларини қидираётганини айтганди.

Нашрнинг қайд этишича, Россия ва Украина ўртасидаги ҳарбий можаро масаласида тинчликпарвар риторика Ватиканда 24 октябрдан кейин янграй бошлаган. Шу куни Рим папаси Франция Президенти Эммануэль Макрон билан суҳбатлашганди. “Le Point” нашрининг ёзишича, Франция Президенти Рим папасидан Украинадаги можарони ҳал қилишда ёрдам бериш учун АҚШ ва Россия етакчилари билан боғланишни сўраган.

4 ноябрь куни Рим папаси Франциск Баҳрайнда “Динлар ўртасидаги мулоқотнинг аҳамияти” форумида Татаристон раҳбари Руслан Миннихонов билан учрашди. РФ Президенти матбуот котиби Дмитрий Песков Россия Рим папаси Франциск билан можарони ҳал қилиш вариантларини муҳокама қилишга тайёрлигини айтди.

8 ноябрь куни Россиянинг Ватикандаги элчиси Александр Авдеев Рим папаси Россия ва Украина ўртасида асирлар алмашинувида иштирок этаётганини маълум қилди.