QALAMPIR.UZ суриштирувидан кейин талабаларга стипендия тўлаб берилди

Аввалроқ, QALAMPIR.UZ’га Тошкент давлат тиббиёт университетининг (собиқ Тошкент давлат стоматология институтининг) 2-курс клиник ординатура (резидентура) босқичида таҳсил олаётган талабалар мурожаат йўллаб, 3 ойдан бери стипендия олишолмаётгани ҳақида маълум қилганди.  QALAMPIR.UZ томонидан эълон қилинган мақоладан сўнг, университет маъмурияти расмий муносабат билдирди.

Университет 2024 йилнинг сентябрь ва октябрь ойлари учун 19 нафар клиник ординаторларга стипендия тўлаб берилмаганини тасдиқлади. 

“Лекин ҳозирги кунда ушбу масала юзасидан қонунчиликда ўрнатилган тартибга кўра, талабаларга стипендияни тўлаб бериш чоралари кўриляпти”, дейилади расмий муносабатда. 

Университет ҳозирги кунда клиник ординатуранинг ўқув жараёнлари натижаларига кўра, кўпчилик 1-курс клиник ординаторлари йиллик аттестациясидан ўта олмагани сабабли, уларга бир неча маротаба қайта топширишга имконият берилгани, улар йиллик аттестациясидан ўтиши учун сўнгги маротаба жорий йилнинг 8 ноябрь куни имтиҳон топширганини ҳам қўшимча қилган. 

“Бугунги кунда аттестациядан муваффақиятли ўтган ва қарздорликни бартараф этган клиник ординаторларни навбатдаги курсга (1-курсдан 2-курсга) ўтказиш ҳамда уларга стипендия тайинлаш тўғрисидаги буйруқлар расмийлаштирилди ва ўрнатилган тартибда стипендия тўловлари тўлиқ амалга оширилади. Клиник ординатура тўғрисидаги низомга мувофиқ, академик қарздорлиги мавжуд бўлган клиник ординаторларга стипендия тўловлари амалга оширилмайди”, дейилади олийгоҳ маъмурияти муносабатида.

Бизга мурожаат қилган талабалар эса 2025 йил сентябрь, октябрь ва ноябрь ойларида олиши керак бўлган стипендиялар ташлаб берилганини маълум қилди. Уларнинг айтишича, масъуллар томонидан аслида ўтган йили ташлаб берилиши керак бўлган пуллар ҳам яқин вақт ичида қопланиши айтилган. 

“3 ойлик стипендия ташлаб берилди. Ўтган йилги пулларни ҳам ташлаб беришаркан”, деди талабалардан бири.