Президент сайловида МДҲ кузатувчиларига ким раҳбарлик қилиши аниқ бўлди

Мустақил давлатлар ҳамдўстлиги Бош котиби Сергей Лебедев Ўзбекистонда 9 июлга белгиланган навбатдан ташқари президентлик сайловларида Ҳамдўстлик кузатувчилари миссиясини бошқаради. Бу ҳақдаги қарор МДҲга аъзо давлатларнинг Ҳамдўстликнинг устав ва бошқа органлари ҳузуридаги доимий ваколатли вакиллари кенгаши йиғилишида қабул қилинган. 

Ўзбекистон Республикасининг янги Конституцияси жорий йилнинг 30 апрелда бўлиб ўтган референдум билан қабул қилинди. Конституция 1 май кунидан бошлаб кучга кирди. Унга кўра, Конституцияга 27 та янги модда киритилди, моддалар сони 128 тадан 155 тага оширилди. 

Референдум орқали қабул қилинган Конституция билан амалдаги Президент Шавкат Мирзиёевнинг муддати ноллашди. Бош қомуснинг 106-моддасига кўра эндиликда Ўзбекистон Республикаси Президентлигига номзод икки марта етти йил муддатга сайланиши мумкин. 

Ўзбекистонда навбатдан ташқари президент сайлови жорий йилнинг 9 июлига белгиланган. Унда Ўзбекистон Экологик партиясидан Абдушукур Худойқулович Ҳамзаев, Халқ демократик партиясидан Улуғбек Илёсович Иноятов, “Адолат” социал-демократик партиясидан Робахон Анваровна Маҳмудова, Тадбиркорлар ва ишбилармонлар ҳаракати – Ўзбекистон Либерал-демократик партиясидан амалдаги Президент Шавкат Мирзиёев Президентлик учун курашади.