Пикассонинг ўғирланган картинаси наркотикка қарши рейдда топилди
Маданият-санъат
−
22 июн 2191 1 дақиқа
Полиция гиёҳванд моддаларнинг ноқонуний айланмасига оид иш бўйича ўтказилган тинтувлар давомида Пабло Пикассонинг ўғирланган картинасини 17 килограмм гашиш ва 200 минг евролик бренд кийим-кечаклар билан бирга мусодара қилди. Бу ҳақда “Deutsche Welle” хабар берди.
Қайд этилишича, полиция операцияси Франция пойтахти яқинидаги Шампиньи-сюр-Марн коммунаси ва Ормессон-сюр-Марн шаҳарчасида бўлиб ўтган. Асли эканлиги тасдиқланган картинада Пикассонинг собиқ маҳбубаси – Мари-Терез Вальтер тасвирланган. Асарнинг қиймати 12-15 миллион еврога баҳоланмоқда.
Картина гиёҳванд моддалар савдоси иши бўйича асосий фигурант бўлган 37 ёшли эркакнинг аммасининг уйидан топилган. У айбини тан олган, бироқ ўз ҳаракатини ўзи ишлайдиган санъат асарларини сақлаш компаниясининг хавфсизлик тизимидаги камчиликларни кўрсатиб қўймоқчи бўлганлиги билан изоҳлаган. Ўғрилик ва ўғирланган нарсани яшириш моддалари бўйича жиноят иши қўзғатилган. Асосий айбланувчи билан бирга яна беш киши қўлга олинган, улардан уч нафари ҳибсга олинган.
Эслатиб ўтамиз, аввалроқ парижлик эркак хайрия лотереясида Пабло Пикассонинг қиймати 1 миллион евродан ортиқ бўлган асл асарини ютиб олган эди.
Live
Барчаси