Озарбайжон яна Россияни огоҳлантирди

Озарбайжон Мудофаа вазирлиги томонидан бир неча бор норозилик билдирилганига қарамай, Россия Федерацияси тинчликпарвар контингентининг расмий ҳисоботларида Озарбайжон аҳоли пунктларининг номлари ҳанузгача арман топонимлари остида келтирилган. Бу ҳақда Озарбайжон Мудофаа вазирлиги матбуот хизмати хабар берди. 

Вазирлик Қорабоғ иқтисодий районини “Тоғли Қорабоғ ҳудуди” деб кўрсатишга чек қўйиш кераклигини таъкидлади.  

“Озарбайжон ҳудудларини сохта арман топонимлари билан тилга олиш қабул қилиниши мумкин эмас”, дейилади хабарда. 

Мудофаа вазирлиги Озарбайжон ҳудудида вақтинча жойлаштирилган Россия тинчликпарвар контингенти қўмондонлигини уларга юборилган расмий ҳужжатларда кўрсатилган мамлакат аҳоли пунктлари номларидан фойдаланишга чақирди.

“Россия Федерацияси тинчликпарвар контингентининг 2022 йил 28 ноябрда Россия Федерацияси Мудофаа вазирлигининг расмий сайтида эълон қилинган хабарида қайд этилган Озарбайжон аҳоли пунктларининг расмий номлари "Мардакерт", "Мартуни", "Мадагиз" ва "Гетаван" эмас, мос равишда Оқдара, Хўжаванд, Суговушан ва Кўзликўприк дея аталсин”, дейилади Озарбайжон Мудофаа вазирлиги баёнотида.