Отаси ўрмонга ташлаб кетган 2 ёшли бола мўъжиза сабаб тирик қолди (видео)

Жорий йилнинг 2 май куни Ҳиндистоннинг Мадхья Прадеш штатида отаси ўрмонга ташлаб кетган 2 ёшли бола мўъжиза сабабли тирик қолди. Бу ҳақда “Times of India” хабар берди.

Қайд этилишича, атиги 2 ёшли бола отаси томонидан ёввойи ҳайвонларга тўла ўрмонга ташлаб кетилганига қарамай, қарийб 20 соат давомида ёлғиз юриб, омон қолган.

Воқеа боланинг онаси ўлдирилганидан кейин бошланган. Ҳодисадан сўнг, эркак ўз фарзандини мотоциклга миндириб, аҳоли яшамайдиган ўрмон ҳудудига олиб борган ва у ерга ташлаб кетган.

Кичкина бола ўрмон ичида мутлақо ёлғиз қолган. У оёқяланг, деярли ҳимоясиз ҳолда, ёввойи ҳайвонлар яшайдиган ҳудудда инстинктив равишда ҳаракат қилиб, узоқ вақт давомида юришда давом этган.

Тергов давомида дастлаб отаси ҳуқуқ-тартибот органларини чалғитган ва боланинг қаердалигини аниқ айтмаган. Шу сабабли, қидирув ишлари кеч бошланган. Кейинчалик полиция, қутқарувчилар ва маҳаллий аҳоли иштирокида кенг кўламли қидирув операцияси йўлга қўйилган. Ўрмон ҳудуди, далалар, сув манбалари ва хавфли жойлар бирма-бир текширилган.

Қарийб 20 соатдан сўнг, эрталаб қутқарувчилар ўрмон ичидан жуда суст овозни эшитиб қолган. Шу овоз орқали улар болани топишга муваффақ бўлган. Бола жуда ҳолдан тойган, чанқаган ва оч қолган бўлса-да, тирик эди.

Бу ҳолат кўпчилик томонидан ҳақиқий мўъжиза сифатида баҳоланмоқда. Чунки бу ёшдаги боланинг ўрмон шароитида, очлик ва хавф остида деярли бир сутка яшаб қолиши ниҳоятда кам учрайдиган ҳодиса ҳисобланади.

Айни пайтда ҳуқуқни муҳофаза қилувчи органлар томонидан тергов ишлари давом этмоқда, боланинг отасига нисбатан оғир жиноят бўйича айблов қўйилиши кутилмоқда.

Эслатиб ўтамиз, аввалроқ Фавқулодда вазиятлар вазирлиги қутқарувчилари Тошкент вилоятининг Оҳангарон туманидаги тоғларида йўқолиб қолган 4 ёшли болани топганди.