Олтин нархи янги тарихий рекорд ўрнатди

Бугун, 8 август куни Чикаго товар биржасида (CME) олтин фьючерслари нархлари 2,32 фоизга ошиб, бир унция учун 3534,1 долларга етди ва рекорд ўрнатди. Бу ҳақда CME маълумотларида келтирилган.

Тошкент вақти билан 10:26 да ўсиш суръати 1,13 фоизгача секинлашди ва котировкалар бир унция учун 3493 долларга қайтди. Аввалги максимум жорий йилнинг 22 апрель кунги савдоларида бир унция учун 3509,9 доллар даражасида қайд этилган.

“Reuters”га кўра, бу АҚШ 1 килограмм оғирликдаги олтин қуймалар импортига бож жорий этгани ҳақидаги хабар ортидан юз берган. Таҳлилчилар бу қарор қимматбаҳо металлар бозорини тубдан ўзгартириши мумкинлигини айтмоқда. Бундан ташқари, бу АҚШ ва Швейцария ўртасидаги муносабатларни ҳам ёмонлаштириши мумкин, чунки Швейцария учун АҚШ энг муҳим экспорт йўналишларидан бири ҳисобланади.

Эслатиб ўтамиз, жорий йилнинг июнь ойида Ўзбекистон Марказий банки 9 тонна олтин сотиб олиб, дунёдаги энг йирик олтин харидори бўлганди. Йил бошидан бери энг кўп олтин харид қилган давлат эса Польша бўлиб, у 6 ойда 67 тонна олтин сотиб олган. Иккинчи ўринда 35 тонна билан Озарбайжон Давлат нефть жамғармаси, учинчи ўринда эса Қозоғистон (22 тонна) қайд этилган.