“Оқ уй ваҳима ичида”. Россия ва Саудия нефть қазиб олишни кескин камайтирмоқчи

Нефть экспорт қилувчи мамлакатлар ташкилоти (OPEC)  йиғилишида Россия, Саудия Арабистони ва бошқа ишлаб чиқарувчилар нефть қазиб олиш кескин қисқартирилишини эълон қилиши кутиляпти. Бу ҳақда “Financial Times” хабар берди.

Қисқартириш ҳажми ҳали келишилмаган. Саудия Арабистони ва Россия қазиб олишни 1-2 миллион баррелга ёки ундан кўпроққа қисқартириш ниятида. Қазиб олиш бир неча ой давомида босқичма-босқич қисқартирилади.

OPEC аъзолари ва бошқа ишлаб чиқарувчиларнинг учрашуви бугун, 5 октябрь куни Венада бўлиб ўтади. Нефть ишлаб чиқаришни сезиларли даражада қисқартириш режалаштирилган йиғилишда Россиядан Бош вазир ўринбосари Александр Новак иштирок этиши ва таклифни маъқуллаши кутиляпти.

Таҳлилчиларга кўра, бу учрашув сўнгги йиллардаги энг муҳими бўлади.

CNN манбаларига кўра, АҚШ Президенти Жо Байден маъмурияти сўнгги кунларда Яқин Шарқдаги иттифоқчиларини, жумладан Кувайт, Саудия Арабистони ва Бирлашган Араб Амирликларини OPEC йиғилишида нефть қазиб олишни қисқартиришга қарши овоз беришга ишонтиришга ҳаракат қилмоқда. Телеканал ўзида мавжуд ёзувларга таяниб, хабар беришича, Оқ уй ишлаб чиқаришни қисқартириш истиқболини “тўлиқ фалокат” ва “душманлик ҳаракати”, деб атаган.

Бошқа бир америкалик мансабдор Оқ уй “ваҳима ичида” эканини айтди.

“Financial Times” нашри келтирган таҳлилларга кўра, ишлаб чиқаришни қисқартириш уруш даврида Россиянинг нефть даромадларини чекламоқчи бўлган Қўшма Штатларнинг жавоб чоралари кўришига сабаб бўлиши мумкин. Сентябрь ойида “Катта еттилик” (G7) давлатлари 5 декабрдан бошлаб Россия нефтига нархларнинг юқори чегарасини жорий этишини эълон қилган эди. Евроиттифоқ давлатлари ҳам Россия нефти учун юқори нархни белгилашга келишган.

CNN'нинг таъкидлашича, кунлик нефть қазиб олишни 1-2 млн баррелга қисқартириш жаҳон бозорида "қора олтин" нархининг кескин ўсишига олиб келиши мумкин.

Ойша Турғунпўлатова