Очарчиликда қолган “Толибон” БМТ билан музокараларни бошламоқда

Афғонистонда ҳукуматни қўлга олган “Толибон” халқаро ташкилотлар билан биргаликда мамлакат учун иқтисодий ёрдамларни қайта йўлга қўядиган янги, таркибида ўз вакиллари бўлган қўмита тузишни таклиф қилди. 

Иқтисодий санкциялар қуршовида қолган Афғонистоннинг бу таклифини БМТ ёки бирорта халқаро ташкилот қўллаб-қувватлаши ҳозирча номаълум. 

2021 йил августда ҳукумат “Толибон” қўлига ўтиши ортидан АҚШ ҳарбийлари мамлакатни тарк этиб, ҳукуматга нисбатан иқтисодий санкциялар жорий этила бошлади. Шусиз ҳам қийинчиликлар билан кун кечираётган мамлакат иқтисодий санкциялар сабабли жар ёқасига келиб қолган. 

“Толибон”га нисбатан жорий қилинган Ғарб санкциялари озиқ-овқат ва дори-дармон таъминоти бўйича халқаро ёрдамларнинг ҳам тўхтатилишига сабаб бўлган. Аммо 2021 йил декабрь ойи оҳирида АҚШ ва БМТ Хавфсизлик Кенгаши жорий қилинган чекловларни юмшата бошлади.   

2022 йил 11 январь куни БМТ халқаро донорлардан Афғонистон учун 2022 йилда гуманитар ёрдам сифатида 4,4 миллиард доллар сўраган, Оқ уй эса мамлакатга қўшимча 308 миллион доллар хайрия қилишини эълон қилган.

“Ушбу қўмитанинг асосий мақсади халқаро ҳамжамиятнинг гуманитар ёрдамларини янада юқори даражада мувофиқлаштириш ва уни ҳақиқатан ҳам муҳтож бўлган одамларнинг қўлига етиб боришини таъминлашдан иборат”, дея билдирган Қобулда БМТ вакиллари иштирокида ўтказилган матбуот анжуманида Афғонистон Бош вазири ўринбосари вазифасини бажарувчи Абдул Салам Ҳанафий. 

Иқтисодий инқироз кучайгани сари миллионлаб одамлар оч қолиши мумкинлиги ҳақидаги огоҳлантиришлар ортидан, хорижий ҳукуматлар Афғонистонга инсонпарварлик ёрдамини кўпайтирмоқда. Аммо халқаро ташкилотлар ажратилган ёрдамлар ҳукуматнинг аралашувидан холи бўлишини хоҳлашмоқда.
 
Афғонистон Молия вазирлиги Матбуот котибига кўра, янги қўмита тузиш бўйича БМТ ва ҳукумат ўртасидаги музокаралар яқин 24 соат ичида ўтказилиши кутилмоқда. 

БМТ Бош котибининг Афғонистон бўйича махсус вакили ўринбосари Рамиз Алакбаровнинг “Reuters” ахборот агентлигига билдиришича, БМТнинг гуманитар ёрдам бўйича ташкилотлари аллақачон “Толибон”га ўз талабларини қўйишни бошлаган.