Назарбоев Тўқаев унинг лавозимини эгаллаганига муносабат билдирди

Кеча, 28 январь куни Қозоғистоннинг Биринчи Президенти – Элбоши Нурсултон Назарбоев мамлакатнинг ҳукмрон “Нур-Отан” партияси раислигидан кетгани, унинг ўрнини амалдаги Президент Қосим-Жомарт Тўқаев эгаллагани ҳақида хабар берган эдик.

“Нур-Отан” партиясининг навбатдан ташқари қурултойида иштирок этган Назарбоев лавозимни Тўқаевга топширгани ҳақида фикр билдириб ўтган.

“Охирги бир ярим йил ичида партия жиддий тизимли қайта ишга туширишни бошдан ўтказди. Мен партиянинг тўлиқ назоратини амалдаги давлат раҳбари Қосим-Жомарт Кемелевич Тўқаевга ўтказилишини ушбу жараённинг сўнгги босқичи деб биламан. Партияга Президент сайловида номзоди кўрсатилган ва уни қўллаб-қувватлаган шахс раҳбарлик қилиши керак. Бугун Қозоғистон Президенти раҳнамолигида энг муҳим ижтимоий-иқтисодий ва сиёсий ислоҳотлар мажмуаси амалга оширилмоқда. “Нур Отан” партияси барча зарур ресурсларга эга бўлган ҳолда уларни амалга оширишда ишончли ёрдамчига айланиши керак”, деган Элбоши.

Элбоши ўз нутқи давомида “Нур Отан” партияси мамлакатдаги асосий сиёсий куч эканлигини таъкидлаган.

“Жамиятнинг барча қатламлари манфаатларини ҳимоя қилган партия мустақиллигимиз ва давлатчилигимиз ҳимояси тарафдори бўлиб келган. Биргаликда биз кўп нарсага эришдик. Энг муҳими, Қозоғистоннинг янада ривожланиши учун ишончли пойдевор яратилди. Бу ҳаракатни давом эттириш муҳимдир”, деган Биринчи Президент.

Эслатиб ўтамиз, 2021 йилнинг ноябрь ойида сиёсий кенгашнинг кенгайтирилган йиғилишида Нурсултон Назарбоев “Нур Отан” партияси раиси ваколатларини топширишга қарор қилган эди. У партияни мамлакат Президенти бошқариши кераклигини таъкидлаган.

Маълумот учун, Нурсултон Назарбоев  2019 йил март ойида лавозимини Қосим-Жомарт Тўқаевга топшириб, Элбоши рутбасини олган ва Хавфсизлик Кенгашини бошқариб келаётган Нурсултон Назарбоев Қозоғистондаги намойишлар авж олиши фонида Хавфсизлик Кенгаши бошқарувини ҳам қўш қўллаб Президент Тўқаевга топширган.

Жорий йилнинг январь ойи бошида Қозоғистонда содир бўлган тартибсизликлар ортидан Назарбоев Президент лавозимидан кетганидан кейин ўзида сақлаб қолган лавозимларни бирин кетин топширди. Буларнинг орасида Хавфсизлик Кенгаши раиси, Халқ Ассамблеяси раиси лавозимлари бор.

Эндиликда Элбошини қатор ҳуқуқлардан ҳам маҳрум қилиш ҳаракати бошланган. Хусусан, 27 январь куни Қозоғистон парламенти Сенати республиканинг биринчи Президенти Нурсултон Назарбоевнинг Хавфсизлик Кенгаши ва Қозоғистон халқи ассамблеясига (ҚХА) умрбод раислигини бекор қилишни кўзда тутувчи қонунни қабул қилди.

Шу билан бирга, сенаторлар қонун лойиҳасини муҳокама қилиш чоғида яна бир тузатиш киритдилар. Унга кўра, “Биринчи Президент тўғрисида”ги қонунда ташқи ва ички асосий йўналишлар бўйича ташаббуслар Элбоши билан келишилиши ҳақидаги банд чиқариб ташланяпти. Лойиҳа муҳокама учун Мажлисга юборилган.