“Навоийуран”га янги директор тайинланди

“Навоийуран” бош директори Жаҳонгир Ҳасанов бошқа ишга ўтгани муносабати билан лавозимидан озод қилиниб, унинг ўрнига Жамол Файзуллаев тайинланди. Бу ҳақда Тоғ-кон саноати ва геология вазирлиги хабар берди.

Қайд этилишича, кеча, 9 сентябрь куни “Навоийуран” давлат корхонасида Тоғ-кон саноати ва геология вазири Бобур Исломов раҳбарлигида геология, тоғ-кон саноати ва металлургия соҳаларидаги долзарб масалалар муҳокамаси юзасидан йиғилиш ўтказилган.

Йиғилишда давлат раҳбари ҳамда ҳукумат томонидан соҳа олдига қўйилган муҳим вазифалар ижросини таъминлаш, ишлар ҳажмини ошириш, сифат кўрсаткичларини яхшилаш, соҳанинг барча йўналишларида натижадорлик ва самарадорликка эришиш лозимлиги таъкидлаб ўтилган.

Шунингдек, йиғилишда “Навоийуран” давлат корхонаси бош директори Жаҳонгир Ҳасанов бошқа ишга ўтгани муносабати билан лавозимидан озод қилингани, унинг вазифасини бажариш тоғ-кон саноати ва геология вазири ўринбосари Жамол Файзуллаев зиммасига юклатилгани эълон қилинган.

Жаҳонгир Ҳасанов 1979 йилда туғилган бўлиб, “Навоийазот” ва “Навоий кон-металлургия комбинати”да турли хил лавозимларда фаолият олиб борган. У 2022 йилда “Навоийуран” давлат корхонаси бош директори этиб тайинланганди.