НАТО давлатлари умумий разведка тармоғини яратади

НАТОга аъзо 16 та давлат ҳамда Финляндия ва Швеция вакиллари кеча, 15 февраль куни Брюсселда сунъий йўлдош разведкасининг умумий тармоғини яратиш тўғрисидаги келишувни имзолади. Бу ҳақда НАТОнинг расмий веб-сайтида маълум қилинди.

Қайд этилишича, иттифоқ томонидан қабул қилинган ҳужжатни АҚШ, Буюк Британия, Бельгия, Болгария, Венгрия, Германия, Греция, Испания, Италия, Канада, Люксембург, Нидерландия, Норвегия, Польша, Руминия, Туркия, Франция, Финляндия ва Швеция вакиллари имзолаган. Бу ташаббус АҚШ ва Финляндия томонидан ҳам қўллаб-қувватланган.

Имзоланган ҳужжатда халқаро ҳамкорлик ва миллий космик имкониятлардан биргаликда фойдаланиш орқали коинотдан кузатиш имкониятларини такомиллаштириш асосларини ишлаб чиқиш истаги билдирилган. Имзоловчи давлатлар сунъий йўлдошлардан маълумотларни алмашиш, маълумотларни имкониятлар доирасида қайта ишлаш, фойдаланиш ва тарқатиш ҳамда тижорат компанияларидан ахборот сотиб олиш учун маблағ билан таъминлаш имкониятларини ўрганадилар. Украинадаги можаро НАТО давлатлари орасида бундай ҳамкорлик зарурлигини кўрсатган.

Келишув бўйича коинот ташаббуси иттифоқининг доимий кузатуви 2025 йилда ишга тушиши кутилмоқда. Уни молиялаштириш учун биринчи бўлиб Люксембург ҳукумати 16,5 миллион евро ажратган.

Шунингдек, НАТО Бош котиби Йенс Столтенберг блок фуқаролик ва ҳарбий сунъий йўлдошлари маълумотларини, шу жумладан, разведка, стратегик мудофаа ва ракета учирилишини аниқлаш мақсадларида бирлаштирувчи виртуал тармоқ яратиш қарорини маъқуллашини маълум қилган. Бу мақсадлар учун виртуал сунъий йўлдош туркуми Aquila яратилиши эълон қилинган.

Альянснинг таъкидлашича, янги ташаббус НАТОнинг коинотдан маълумотларни йиғиш ва ундан фойдаланиш усулини ўзгартиради, НАТОнинг разведка имкониятларини сезиларли даражада яхшилайди, шунингдек, НАТО ҳарбий миссиялари ва операцияларига катта ёрдам беради.