Месси “Барселона”ни чемпионлик билан табриклади

“Барселона”нинг собиқ футболчиси Лионель Месси собиқ жамоасини Испания чемпионлигини қўлга киритгани билан табриклади. Бу ҳақда аргентиналик футбол юлдузи ўзининг Instagram’даги саҳифасида маълум қилди.

Кеча, 10 май куни Испания чемпионатининг 35-тури доирасида “Барселона” ўз майдонида “Реал Мадрид”ни 2:0 ҳисобида мағлуб этиб, муддатидан аввал чемпионликни расман қўлга киритди. Каталония клуби ўз тарихида 29-бор Испания чемпионига айланди. 

Месси ўзининг Instagram саҳифасидаги ҳикоясида: “Чемпионлар! Яшасин Барса!” деб ёзиб қолдириб, ўзининг собиқ жамоасини чемпионлик билан табриклади.

38 ёшли футболчи Испания чемпионати, “Барселона” ҳамда Аргентина терма жамоаси тарихидаги энг яхши тўпурар ҳисобланади. Месси 2005-2021 йиллар давомида “Барселона” сафида тўп суриб, клуб билан 10 марта Ла Лига ва 4 марта UEFA Чемпионлар лигаси ғолибига айланган.

Ҳозирда “Интер Майами” шарафини ҳимоя қилаётган Месси ўтган йилнинг декабрь ойида клуб билан MLS чемпионлигини ҳам қўлга киритганди.