Markaziy Osiyodagi eng ko‘p spirtli ichimlik ichuvchi mamlakatlar ma’lum bo‘ldi

Qozog‘iston Markaziy Osiyoning eng ko‘p spirtli ichimlik ichuvchi davlati deb topildi. Bu haqda “World Population Review” portalining aholi jon boshiga alkogol iste’mol qilish bo‘yicha yangilangan global reytingida keltirilgan.

Tadqiqot natijalariga ko‘ra, Qozog‘iston Markaziy Osiyo mamlakatlari orasida o‘z qo‘shnilarini sezilarli darajada ortda qoldirib, birinchi o‘rinni egallagan. Ushbu mamlakat global ro‘yxatning o‘rtalaridan joy olgan va yiliga kishi boshiga 5,4 litr sof spirt ko‘rsatkichi bilan Kambodja hamda Zimbabve bilan bir pog‘onani bo‘lishib, 83-o‘rinni band etgan.

Markaziy Osiyo mintaqasi miqyosida esa Qozog‘iston Respublikasi mutlaq yetakchiga aylangan. Undan keyingi o‘rinlar:

• Qirg‘iziston – 3,9 litr (dunyoda 101-o‘rin);
• Turkmaniston – 3 litr (dunyoda 119-o‘rin);
• O‘zbekiston – 2,1 litr (dunyoda 132-o‘rin);
• Tojikiston – 0,7 litr (dunyoda 154-o‘rin).

Eng past ko‘rsatkichlar (mutlaq nolga yaqin – yiliga 0,1 litr) bir qator musulmon davlatlari – Quvayt, Eron, Suriya va Pokistonda qayd etilgan.

Alkogol iste’mol qilish bo‘yicha dunyo yetakchisi sifatida Ruminiya tan olingan – u yerda 15 yoshdan katta bo‘lgan har bir turg‘unga yiliga rekord darajadagi 17,1 litr sof spirt to‘g‘ri keladi.

Eslatib o‘tamiz, avvalroq dunyo bo‘ylab vino iste’moli 1957 yildan buyon eng past ko‘rsatkichga tushgani haqida xabar berilgan edi. Hisobotga ko‘ra, dunyodagi eng yirik vino bozori bo‘lgan AQSH va Germaniyada iste’mol bir yil ichida 4,3 foizga, Fransiyada 3,2 foizga, Italiyada esa 9,4 foizga kamaygan.