Мане Африка кубогида бошқа иштирок этмаслигини эълон қилди

Сенегал терма жамоаси сардори Садио Мане Африка Миллатлар Кубоги турнирида миллий жамоа билан бирга бошқа иштирок этмаслигини маълум қилди. Бу ҳақда спортчи RMC Sport’га берган интервьюсида гапирди.

“Бу менинг сўнгги Африка Миллатлар Кубогимми? Ҳа, мен бу ҳақда аввал ҳам айтганман, ҳозир яна такрорлайман. Африка Миллатлар Кубогидаги даврим якунланди. Агар иродам етса, шу ерда тўхтайман. Жамоада авлодлар алмашинуви таъминланган, йигитлар бу босқичга тайёр деб ўйлайман. Энди мен уларни трибунадан қўллаб-қувватлайдиган 12-футболчи бўламан”, дейди Мане.

Кеча, 18 январ куни Турнир финали қўшимча вақтда Папе Гейенинг голи эвазига Сенегал Марокаш терма жамоасини 1:0 ҳисобида мағлуб этди.

Учрашувнинг асосий вақитга қўшиб берилган 90+8-дақиқада бош ҳакам Сенегал дарвозаси томон пенальти белгилади. Бу қарордан сўнг сенегаллик футболчиларнинг аксарияти норози бўлиб, майдонни тарк этди. Бироқ жамоа сардори Садио Мане уларни тинчлантириб, ўйинни давом эттиришга кўндирди. 

90+24-дақиқада Марокаш ярим ҳимоячиси Браим Диас пенальтидан унумли фойдалана олмади. 

Қўшимча вақтда эса Сенегал ҳал қилувчи голни урди. 94-дақиқада ярим ҳимоячи Папе Гуэйе аниқ зарба билан жамоасига ғалаба келтирди.

Маълумот учун, Сенегал терма жамоаси ўз тарихида иккинчи марта Африка Миллатлар Кубоги ғолиби бўлди (2021, 2025). Марокаш эса мусобақада бир марта – 1976 йилда чемпионликни қўлга киритган.