Маданият вазирлиги Тошкент курантидаги “лента”ларни олиб ташлашни талаб қилди

Маданий мерос объектлари реестрига киритилган Тошкент курантларини безатиш Маданият вазирлиги ҳузуридаги Маданий мерос департаменти билан келишилмаган. Вазирлик ушбу курантлардаги бант ва “лента”ларни олиб ташлашни талаб қилмоқда.

Маданият вазирлигининг QALAMPIR.UZ’га маълум қилишича, Маданий мерос департаменти Тошкент шаҳри маданий мерос бошқармаси томонидан бант ва “лента”лар пайдо бўлганидан сўнг, 27 ноябрь куни Бинолардан фойдаланиш департаментига Тошкент курантларидаги ноқонуний ўрнатилган элементларни олиб ташлаш тўғрисида огоҳлантириш хатлари юборилган.

Вазирликнинг огоҳлантириш хатида қайд этилишича, Вазирлар Маҳкамасининг 265-сонли қарорининг 6-иловаси талабларидан келиб чиқиб, моддий маданий мероснинг кўчмас мулк объектлари ва уларнинг қўриқланадиган теграларида ер қазиш, ер тузиш, қурилиш, мелиорация ва бошқа хўжалик ишлари, асрашга доир ишларни амалга ошириш ҳамда илмий ва илмий-техник тадқиқотлар ўтказишга оид лойиҳаларга Маданий мерос департаменти қошидаги Илмий-эксперт кенгашидан хулоса олган ҳолда амалга ошириш талаб этилади.

Юқоридаги асослардан келиб чиқиб, “Тошкент куранти” маданий мерос объектига ўрнатилган элементларни зудлик билан олиб ташлашни сўраган. 

Жорий йилнинг ноябрь ойи охирида Тошкент курантлари биносининг олд қисмида қизил рангли “лента”лар ва бант пайдо бўлганди. Бинонинг олд қисмидаги бант ва “лента” ҳозирча олиб ташланмаган.