Крикет: Ўзбекистон ва Покистон ҳамкорлик меморандуми имзолади

Жорий йилнинг 21 сентябрь куни Ўзбекистон крикет федерацияси ва Покистон крикет кенгаши ўртасида ҳамкорлик меморандуми имзоланди. Бу ҳақда Туризм ва спорт вазирлиги Матбуот хизмати хабар берди. 

Лахорда бўлиб ўтган учрашувда Ўзбекистон крикет федерацияси раиси Азиз Михлиев ва Покистон крикет кенгаши раиси Рамиз Рожа ўртасида Ўзбекистонда крикетни интеллектуал ривожлантириш тўғрисидаги меморандум имзонлади. Унга мувофиқ, эндиликда Покистон крикет кенгаши томонидан ушбу спорт тури бўйича Ўзбекистонда ўқув-таълим ишлари амалга оширилади. Бунда асосан мураббийлар ва крикетчиларнинг маҳоратларини ошириши учун ўқув-машғулотлар олиб борилади.

Шунингдек, Ўзбекистон крикет федерацияси ва Покистон крикет кенгаши ўртасидаги ҳамкорликни кучайтириш масалалари муҳокама қилинган ва ҳар икки ташкилот ўртасида ўзаро тажриба алмашинувини йўлга қўйиш борасида ҳам келишувга эришилган.

Махсус дастурга мувофиқ, Покистон крикет кенгаши томонидан Ўзбекистонга покистонлик мутахассислар юборилади ва улар томонидан босқичма-босқич ҳакамлик ва мураббийлик курслари, турли даражадаги амалий ва назарий ўқув-йиғинлар ўтказилади. Бундан ташқари, Покистоннинг Лахор шаҳридаги Крикет миллий маҳорат марказида турли ёшдаги жамоалар учун ўқув-машғулот йиғинлари ташкил этилади.

Эслатиб ўтамиз, жорий йилнинг июль ойида Покистон Ислом Республикаси Бош вазири Имрон Хон расмий ташриф билан Ўзбекистонга келганди. Ташриф доирасида Ўзбекистон Республикаси Президенти Шавкат Мирзиёев иштирокида ўтказилган матбуот анжуманида икки давлат ўртасида дўстона алоқаларни янада мустаҳкамлаш, шунингдек, крикет спортини ривожлантириш масалалари ҳам муҳокама қилинган эди.