Кремлга маломатлар қилган Помпео Путинни бир жумла билан тарифлади

АҚШ Марказий разведка бошқармаси ва Давлат департаментининг собиқ раҳбари Майк Помпео C-SPAN канали эфирида Россия Президенти Владимир Путин қандай раҳбар эканини тарифлаб берди.

“Жуда тушунарли, жуда қобилиятли, мен уни ақл бовар қилмайдиган даражада ҳурмат қиламан. Мени бундай сўзлар учун тез-тез танқид қилишарди”, деган сиёсатчи.

Унинг сўзларига кўра, Путин яхши маълумотга эга ва Россия манфаатларини аниқ ифодалайдиган “ажойиб суҳбатдош”. Помпеонинг сўзларига кўра, америкалик музокарачилар белгиланган даражага етиши керак бўлган.

“Мен уни ҳамма нарсани ҳисоблаб чиқадиган мураккаб шахс сифатида кўраман. Биз у билан рози бўлмаслигимиз мумкин, аммо у барибир ўз билганини қилади” дея қўшимча қилган собиқ Давлат котиби.

Қайд этиш керакки, АҚШнинг 45-Президенти Дональд Трамп даврида Давлат котиби лавозимини эгаллаган Помпео ҳукумат аъзоси бўлган вақтида Россия ҳукумати ва Кремлга қарши кўплаб маломатлар ёғдирган.