Kongoda Ebola qurbonlari soni 900 nafarga yaqinlashdi

Kongo Demokratik Respublikasida Bundibugiyo virusi sabab yuzaga kelgan Ebola epidemiyasida vafot etganlar soni 864 nafarga, tasdiqlangan kasallanish holatlari esa 2,2 ming nafarga yetdi. Bu haqda Jahon sog‘liqni saqlash tashkiloti xabar berdi.

JSST ma’lumotlariga ko‘ra, kasallik Bundibugyo virusi sabab yuzaga kelgan bo‘lib, uning uzluksiz tarqalishi yangi kasallanish va o‘lim holatlarining ortishiga olib kelmoqda. Tashkilotning baholashicha, bu Kongo Demokratik Respublikasi tarixida kuzatuvlar davridagi uchinchi eng yirik Ebola epidemiyasi hisoblanadi.

Kasallanish holatlari Ugandada ham qayd etilgan. Biroq mamlakatda joriy yilning 21 iyunidan buyon yangi bemor aniqlanmagan. Oxirgi bemor joriy yilning 16 iyul kuni ketma-ket ikki marta manfiy test natijasini olgach, davolash markazidan chiqarilgan. Shundan so‘ng Uganda epidemiya tugaganini e’lon qilishdan oldin talab etiladigan 42 kunlik kuchaytirilgan kuzatuv davrini boshlagan.

JSST ma’lumotlariga ko‘ra, hozirga qadar kamida 410 nafar bemor sog‘aygan. Ularning 390 nafari Kongo Demokratik Respublikasida, 18 nafari Ugandada, yana bittadan bemor Fransiya va Germaniyada davolangan.

Eslatib o‘tamiz, avvalroq Ebola epidemiyasi yashirin ko‘lamda tarqalayotgan bo‘lishi mumkinligi, JSST Kongo Demokratik Respublikasidagi haqiqiy kasallanish holatlari rasmiy ma’lumotlardan bir necha barobar ko‘p ekanini bildirgani haqida xabar berilgan edi.